മേപ്പാടി ദുരന്തം: മീനാക്ഷിപ്പുഴയിൽ നിന്ന് ഒരു മൃതദേഹം കൂടി; മരണസംഖ്യ ഏഴായി

വയനാട് കള്ളാടി തുരങ്കപാതയിലുണ്ടായ മണ്ണിടിച്ചിലിൽ കാണാതായവർക്കായുള്ള തിരച്ചിലിൽ മീനാക്ഷിപ്പുഴയിൽ നിന്ന് ഒരു മൃതദേഹം കൂടി കണ്ടെടുത്തു. ഇതോടെ ദുരന്തത്തിൽ ജീവൻ നഷ്ടപ്പെട്ടവരുടെ എണ്ണം ഏഴായി. അനുകൂലമായ കാലാവസ്ഥ തിരച്ചിൽ ദൗത്യത്തിന് നിലവിൽ വേഗത കൂട്ടിയിട്ടുണ്ട്.

തുരങ്കപാത നിർമ്മാണ കമ്പനിയിലെ സർവേയറും പശ്ചിമബംഗാൾ സ്വദേശിയുമായ രാകേഷ് ഗുച്ചൈതിന്റെ (24) മൃതദേഹമാണ് ഒടുവിൽ കണ്ടെത്തിയത്. മണ്ണുമാന്തി യന്ത്രം ഉപയോഗിച്ച് പുഴയിലെ മണ്ണ് നീക്കുന്നതിനിടയിലാണ് മൃതദേഹം ശ്രദ്ധയിൽപ്പെട്ടത്. വൈത്തിരി താലൂക്ക് ആശുപത്രിയിലെ പോസ്റ്റ്‌മോർട്ടത്തിന് ശേഷം മൃതദേഹം കോഴിക്കോട് മെഡിക്കൽ കോളേജിലേക്ക് മാറ്റും.

കഴിഞ്ഞദിവസം എൻജിനിയർ രാഹുൽ ശർമ, സർവേയർ അസ്ഹറുദ്ദീൻ അൻസാരി, എസ്‌കവേറ്റർ ഓപ്പറേറ്റർ മുഹമ്മദ് ഇമ്രാൻ എന്നിവരുടെ മൃതദേഹങ്ങൾ പുഴയുടെ വിവിധ ഭാഗങ്ങളിൽ നിന്നായി കണ്ടെടുത്തിരുന്നു. ഇനി കൺസ്ട്രക്‌ഷൻ മാനേജർ വിക്രം റാണയെ മാത്രമാണ് കണ്ടെത്താനുള്ളത്. എൻ.ഡി.ആർ.എഫ് (NDRF), ഫയർഫോഴ്സ്, പോലീസ്, സന്നദ്ധസേനകൾ എന്നിവരുടെ നേതൃത്വത്തിൽ പ്രദേശത്ത് തിരച്ചിൽ തുടരുകയാണ്.