മെസ്സിയുടെ പേരിലെ തട്ടിപ്പ്: മുൻ കായിക മന്ത്രി അബ്ദുറഹ്മാനെ എസ്.ഐ.ടി ചോദ്യം ചെയ്യും; പിടിച്ചെടുത്ത രേഖകൾ കോടതിയിൽ ഹാജരാക്കും

സൂപ്പർ താരം ലയണൽ മെസ്സിയെയും അർജന്റീന ടീമിനെയും കേരളത്തിൽ എത്തിക്കാമെന്ന് വാഗ്ദാനം ചെയ്ത് നടത്തിയ തട്ടിപ്പ് കേസിൽ മുൻ കായിക മന്ത്രി അബ്ദുറഹ്മാനെ പ്രത്യേക അന്വേഷണ സംഘം (എസ്.ഐ.ടി) വൈകാതെ ചോദ്യം ചെയ്യും. കേസിന്റെ ഭാഗമായി റിപ്പോർട്ടർ ടി.വി ഓഫീസിൽ നിന്ന് പിടിച്ചെടുത്ത രേഖകൾ വിശദമായി പരിശോധിച്ച ശേഷമായിരിക്കും ചോദ്യം ചെയ്യൽ ഉൾപ്പെടെയുള്ള നടപടികളിലേക്ക് കടക്കുക. പിടിച്ചെടുത്ത രേഖകൾ അന്വേഷണ സംഘം ഇന്ന് കോടതിയിൽ ഹാജരാക്കും.

റിപ്പോർട്ടർ ടി.വി ഓഫീസിൽ തൃക്കാക്കര എ.സി.പി ബിജോയ് ചന്ദ്രന്റെ നേതൃത്വത്തിൽ നടന്ന 20 മണിക്കൂർ നീണ്ട പരിശോധനയിൽ മെമ്മറി കാർഡുകൾ, കലൂർ സ്റ്റേഡിയവുമായി ബന്ധപ്പെട്ട രേഖകൾ, 6300 അമേരിക്കൻ ഡോളർ എന്നിവ കണ്ടെടുത്തു. പിടിച്ചെടുത്ത മൊബൈൽ ഫോണുകളും ലാപ്ടോപ്പുകളും ഫോറൻസിക് പരിശോധനയ്ക്ക് അയക്കുന്നതിനായി പോലീസ്‌ ഇന്ന് കോടതിയിൽ അപേക്ഷ സമർപ്പിക്കും. ആന്റോ അഗസ്റ്റിന്റെയും സഹോദരങ്ങളുടെയും ഫ്ലാറ്റിലും ഇവരുമായി ബന്ധമുള്ള മാർക്കറ്റിംഗ് കമ്പനിയായ ഗോട് ആഡിലും പോലീസ് പരിശോധന നടത്തി. റിപ്പോർട്ടർ ഓഫീസിലെ റെയ്ഡ് നിയമപ്രകാരം മാത്രമാണെന്ന് ആഭ്യന്തര മന്ത്രി രമേശ് ചെന്നിത്തല പ്രതികരിച്ചു.

അതേസമയം, സാമ്പത്തിക തട്ടിപ്പിൽ എസ്.ഐ.ടി കേസ് രജിസ്റ്റർ ചെയ്തതോടെ എൻഫോഴ്സ്‌മെന്റ് ഡയറക്ടറേറ്റും (ഇ.ഡി) അന്വേഷണം ശക്തമാക്കാൻ ഒരുങ്ങുകയാണ്. അനധികൃത പണം തട്ടിപ്പിനായി ഉപയോഗിച്ച് കള്ളപ്പണം വെളുപ്പിക്കൽ നടന്നിട്ടുണ്ടോ എന്ന് ഇ.ഡി അന്വേഷിക്കും. ഇതിനായി പി.എം.എൽ.എ വകുപ്പ് ചുമത്താനാണ് ഇ.ഡിയുടെ നീക്കം. വിദേശത്തേക്ക് പണം അയച്ചതിൽ ബാങ്കിംഗ് നിയമലംഘനം നടന്നെന്ന സംശയത്തിൽ നിലവിൽ ഫെമ നിയമപ്രകാരമാണ് ഇ.ഡി കേസെടുത്തിരിക്കുന്നത്.