നിപ: പുതിയ കേസുകളില്ല, സമ്പർക്കപ്പട്ടികയിൽ 87 പേർ; മൂന്ന് പേരെക്കൂടി ആശുപത്രിയിലേക്ക് മാറ്റി

സംസ്ഥാനത്ത് നിലവിൽ പുതിയ നിപ കേസുകളൊന്നും റിപ്പോർട്ട് ചെയ്തിട്ടില്ലെന്ന് ആരോഗ്യവകുപ്പ് മന്ത്രി കെ. മുരളീധരൻ അറിയിച്ചു. ജാഗ്രതയുടെ ഭാഗമായി സമ്പർക്കപ്പട്ടികയിൽ ക്വാറന്റൈനിലുണ്ടായിരുന്ന മൂന്ന് പേരെക്കൂടി നിരീക്ഷണത്തിനായി ആശുപത്രിയിൽ പ്രവേശിപ്പിച്ചു. ഇവരുടെ സ്രവ സാമ്പിളുകൾ വിശദമായ പരിശോധനയ്ക്കായി അയച്ചിട്ടുണ്ട്. നിലവിൽ കോഴിക്കോട് മെഡിക്കൽ കോളേജിൽ ചികിത്സയിലുള്ള രോഗിക്ക് ഐ.എം.സി.ആർ മാനദണ്ഡങ്ങൾ പ്രകാരം മോണോക്ലോണൽ ആന്റിബോഡിയുടെ ആദ്യ ഡോസ് നൽകിയതായും മന്ത്രി വാർത്താക്കുറിപ്പിലൂടെ വ്യക്തമാക്കി.

പ്രതിരോധ നടപടികൾ ഊർജ്ജിതമാക്കുന്നതിന്റെ ഭാഗമായി നിപ സമ്പർക്കപ്പട്ടിക കൂടുതൽ വിപുലീകരിച്ചു. പുതുതായി 10 പേരെക്കൂടി ഉൾപ്പെടുത്തിയതോടെ ആകെ സമ്പർക്കപ്പട്ടികയിലുള്ളവരുടെ എണ്ണം 87 ആയി. ഇതിൽ ഹൈയെസ്റ്റ് റിസ്ക് വിഭാഗത്തിൽ നാല് പേരും, ഹൈറിസ്ക് വിഭാഗത്തിൽ 16 പേരും, ലോ റിസ്ക് വിഭാഗത്തിൽ 67 പേരുമാണുള്ളത്. നിരീക്ഷണത്തിലുള്ള എല്ലാവരെയും കൺട്രോൾ റൂമിൽ നിന്ന് ദിവസം രണ്ടുനേരം വിളിച്ച് വിവരങ്ങൾ ശേഖരിക്കുന്നുണ്ട്.

രോഗം റിപ്പോര്‍ട്ട് ചെയ്യപ്പെട്ട രാമനാട്ടുകര നഗരസഭയിലെ അഞ്ചാം ഡിവിഷനിലുള്ള 286 വീടുകളില്‍ ആരോഗ്യ പ്രവര്‍ത്തകര്‍ സര്‍വേ പൂർത്തിയാക്കി. ഇതിൽ പനിയുള്ള 12 പേരെ കണ്ടെത്തിയെങ്കിലും ഇവർക്ക് നിപയുമായി ബന്ധപ്പെട്ട ലക്ഷണങ്ങളൊന്നുമില്ല. കേന്ദ്ര സർക്കാരിന്റെ നാഷണല്‍ ഡിസീസ് കണ്‍ട്രോള്‍ സെന്ററില്‍ (NCDC) നിന്നുള്ള വിദഗ്ധ സംഘം നാളെ (ജൂണ്‍ 13) കോഴിക്കോട് ജില്ല സന്ദര്‍ശിച്ച് സ്ഥിതിഗതികൾ വിലയിരുത്തും.