സുകുമാരക്കുറുപ്പ് ബ്രൂണെയിലുണ്ടെന്ന വാർത്തക​ളിൽ സ്ഥിരീകരണമില്ലെന്ന് കേരള പോലീസ്

പിടികിട്ടാപ്പുള്ളി സുകുമാരക്കുറുപ്പ് വ്യാജ പേരിൽ ബ്രൂണെയിൽ ജീവിച്ചിരിപ്പുണ്ടെന്ന വാർത്തകളിൽ സ്ഥിരീകരണമില്ലെന്ന് കേരള പോലീസ്. കേസ് ഫയലുകൾ ഔദ്യോഗികമായി അവസാനിപ്പിച്ച് ക്രൈംബ്രാഞ്ച് മേധാവിക്ക് റിപ്പോർട്ട് കൈമാറാനിരിക്കെയാണ് ഈ അഭ്യൂഹങ്ങൾ പുറത്തുവന്നത്. പ്രചരിക്കുന്ന ചിത്രത്തിലുള്ള വ്യക്തി തൃശൂർ സ്വദേശിയാണെന്ന സൂചനകളും നിലവിലുണ്ട്.

ഒരു സൈബർ വിദഗ്ധന്റെ സ്വകാര്യ അന്വേഷണത്തിൽ സുകുമാരക്കുറുപ്പുമായി സാദൃശ്യമുള്ള വയോധികനെ ബ്രൂണെയിൽ കണ്ടെത്തിയെന്നും 2023-ലെ ചിത്രങ്ങൾ ലഭ്യമായെന്നുമായിരുന്നു റിപ്പോർട്ടുകൾ. നാട്ടിലുള്ള ബന്ധുക്കളുമായി ഇയാൾ ബന്ധപ്പെടുന്നുണ്ടെന്ന അവകാശവാദവും ഉയർന്നിരുന്നു. എന്നാൽ കേസിന്റെ തുടക്കം മുതൽ ഇത്തരം നിരവധി അഭ്യൂഹങ്ങൾ വന്നിട്ടുണ്ടെന്നും അന്വേഷണത്തിൽ തെളിവുകളൊന്നും ലഭിച്ചിട്ടില്ലെന്നുമാണ് പോലീസിന്റെ നിലപാട്.

1984-ൽ ഇൻഷുറൻസ് തുക തട്ടിയെടുക്കാൻ ചാക്കോയെ കൊലപ്പെടുത്തി മുങ്ങിയ സുകുമാരക്കുറുപ്പിനായി ഇന്റർപോൾ ഉൾപ്പെടെ തിരച്ചിൽ നടത്തിയിരുന്നു. 12 വർഷത്തോളം ഇന്ത്യയിലുടനീളം പോലീസ് വ്യാപക പരിശോധന നടത്തിയെങ്കിലും കുറുപ്പ് വ്യാജ പേരുകളിൽ രക്ഷപ്പെടുകയായിരുന്നു. ആരോഗ്യപ്രശ്നങ്ങൾ കാരണം ഇയാൾ ജീവിച്ചിരിക്കാൻ സാധ്യതയില്ലെന്ന നിഗമനത്തിൽ 42 വർഷം നീണ്ട അന്വേഷണം അവസാനിപ്പിക്കാൻ പോലീസ് ഒരുങ്ങുന്നതിനിടെയാണ് പുതിയ വിവരങ്ങൾ പുറത്തുവന്നത്.