ജിഎൻഎ വൈദ്യുതി കരാർ ഉണ്ടായിട്ടില്ല; സമ്മർദശ്രമമെന്ന് മുഖ്യമന്ത്രി

ജിഎൻഎയുമായി വൈദ്യുതി വാങ്ങാൻ കെ.എസ്.ഇ.ബി കരാറിൽ ഏർപ്പെട്ടിട്ടില്ലെന്ന് മുഖ്യമന്ത്രി വി.ഡി. സതീശൻ. സമ്മർദം ചെലുത്തി കരാറിൽ ഒപ്പിടുവിക്കാനാണ് ശ്രമം നടന്നതെന്നും മുഖ്യമന്ത്രി ആരോപിച്ചു. വൈദ്യുതി കരാർ വിവാദത്തിൽ വിശദീകരണം നൽകുകയായിരുന്നു അദ്ദേഹം.

ഹിമാചൽ പ്രദേശിൽനിന്നും ജിഎൻഎയിൽനിന്നും വൈദ്യുതി വാങ്ങാനുള്ള രണ്ട് നിർദേശങ്ങളാണ് തന്റെ മുന്നിലെത്തിയതെന്ന് മുഖ്യമന്ത്രി പറഞ്ഞു. ഇവ താരതമ്യം ചെയ്തപ്പോൾ കൂടുതൽ ലാഭകരമെന്ന് കണ്ടത് ജിഎൻഎയെയായിരുന്നു. എന്നാൽ കരാറിൽ ഒപ്പിട്ടിട്ടില്ലെന്നും കൂടുതൽ പരിശോധന നടത്തിയ ശേഷം ആവശ്യമെങ്കിൽ കരാറിലേക്ക് കടക്കാമെന്നുമാണ് നിർദേശിച്ചതെന്നും അദ്ദേഹം വ്യക്തമാക്കി.

വൈദ്യുതി പ്രതിസന്ധിയുണ്ടാകുമെന്ന റിപ്പോർട്ടുകൾ ചൂണ്ടിക്കാട്ടി അടിയന്തരമായി കരാറിൽ ഒപ്പിടാൻ സമ്മർദമുണ്ടായെന്നും മുഖ്യമന്ത്രി ആരോപിച്ചു. എന്നാൽ പിന്നീട് ലഭിച്ച റിപ്പോർട്ടിൽ നവംബർ, ഡിസംബർ മാസങ്ങളിൽ വൈദ്യുതി പ്രതിസന്ധിയുണ്ടാകില്ലെന്നാണ് അറിയിച്ചത്. എൻടിപിസി ഏപ്രിൽ മുതൽ യൂണിറ്റിന് 5.18 രൂപ നിരക്കിൽ വൈദ്യുതി നൽകാമെന്ന് അറിയിച്ചിട്ടുണ്ടെന്നും മുഖ്യമന്ത്രി പറഞ്ഞു.

കഴിഞ്ഞ പത്ത് വർഷമായി വൈദ്യുതി മേഖലയിലെ ആസൂത്രണത്തിൽ വീഴ്ചയുണ്ടായെന്നും കുറഞ്ഞ നിരക്കിൽ വൈദ്യുതി ലഭ്യമായിരുന്ന സമയത്ത് ദീർഘകാല കരാറുകൾ ഉണ്ടാക്കാതിരുന്നത് ഗുരുതരമായ വീഴ്ചയാണെന്നും അദ്ദേഹം വിമർശിച്ചു. പ്രതിപക്ഷ നേതാവ് പിണറായി വിജയൻ വിഷയത്തിൽ പരസ്പരവിരുദ്ധമായ കാര്യങ്ങളാണ് ഉന്നയിക്കുന്നതെന്നും മുഖ്യമന്ത്രി ആരോപിച്ചു.