ചിത്രവും പേരും ദുരുപയോഗം ചെയ്ത് അശ്ലീല പോസ്റ്റുകൾ; ജി. സുധാകരൻ പൊലീസിൽ പരാതി നൽകി

സൈബർ ആക്രമണത്തിനെതിരെ മുൻ മന്ത്രിയും, മുതിർന്ന സിപിഎം നേതാവുമായ ജി. സുധാകരൻ പൊലീസിൽ പരാതി. തന്റെ ചിത്രവും പേരും ഉപയോഗിച്ച് സാമൂഹ്യ മാധ്യമങ്ങളിൽ അശ്ലീലവും ക്രിമിനൽ സ്വഭാവമുള്ളതുമായ പോസ്റ്റുകൾ പ്രചരിപ്പിക്കുന്നു എന്നാണ് പരാതി. അമ്പലപ്പുഴ ഡിവൈഎസ്പിക്കാണ് സുധാകരൻ സ്റ്റേഷനിൽ നേരിട്ടെത്തി പരാതി നൽകിയത്. 'സഖാവ് പിണറായി വിജയന് ജി. സുധാകരൻ അയച്ച കവിത വൈറലാകുന്നു' എന്ന തലക്കെട്ടോടെയാണ് കുറിപ്പ് പ്രചരിക്കുന്നത്. സമാന രീതിയിൽ തന്നെ ലക്ഷ്യംവെച്ച നിരവധി ക്രിമിനൽ സ്വഭാവമുള്ള പോസ്റ്ററുകളും സന്ദേശങ്ങളും കഴിഞ്ഞ ദിവസങ്ങളിൽ സോഷ്യൽ മീഡിയയിൽ പ്രചരിക്കുന്നുണ്ടെന്ന് സുധാകരൻ ഫേസ്ബുക്ക് പോസ്റ്റിലൂടെ നേരത്തെ തന്നെ സൂചിപ്പിച്ചിരുന്നു. ''ഇത് എന്നെ മനഃപൂർവം അപമാനിക്കാൻ ലക്ഷ്യമിട്ടുള്ള സംഘടിത നീക്കമാണ്,'' എന്നും അദ്ദേഹം വ്യക്തമാക്കിയിരുന്നു. ഇതിന് പിന്നാലെയാണ് സൈബർ ആക്രമണത്തിൽ അന്വേഷണമാവശ്യപ്പെട്ട് സുധാകരൻ ഡിവൈഎസ്പിക്ക് പരാതി നൽകിയത്.