എസ്. ജാനകിയുടെ മൃതദേഹത്തിന് മുന്നിൽ പൊട്ടിക്കരഞ്ഞ് ചിത്ര; മൈസൂരുവിൽ പൊതുദർശനം തുടരുന്നു

അന്തരിച്ച പ്രശസ്ത ഗായിക എസ്. ജാനകിയുടെ മൃതദേഹത്തിന് മുന്നിൽ വിങ്ങിപ്പൊട്ടി ഗായിക കെ.എസ്. ചിത്ര. മൈസൂരുവിൽ നടക്കുന്ന പൊതുദർശനത്തിനിടെയാണ് ചിത്രയും ഗായിക സുജാതയും ജാനകിക്ക് അന്തിമോപചാരം അർപ്പിക്കാനെത്തിയത്. സാംസ്കാരിക, രാഷ്ട്രീയ രംഗങ്ങളിൽ നിന്നുള്ള പ്രമുഖർ ഉൾപ്പെടെ ആയിരക്കണക്കിന് ആളുകളാണ് പ്രിയ ഗായികയെ അവസാനമായി ഒരുനോക്ക് കാണാൻ എത്തിക്കൊണ്ടിരിക്കുന്നത്. സംസ്കാരം ഇന്ന് ഔദ്യോഗിക ബഹുമതികളോടെ നടക്കും.

ശ്വസനസംബന്ധമായ ബുദ്ധിമുട്ടുകളെ തുടർന്ന് മൈസൂരു അപ്പോളോ ആശുപത്രിയിൽ ചികിത്സയിലിരിക്കെയായിരുന്നു അന്ത്യം. ഉച്ചയോടെ ആശുപത്രിയിൽ പ്രവേശിപ്പിച്ചെങ്കിലും വൈകിട്ട് 7.30-ഓടെ മരണം സംഭവിക്കുകയായിരുന്നു. കുടുംബം കടുത്ത ദുഃഖത്തിലൂടെയാണ് കടന്നുപോകുന്നതെന്നും ഈ പ്രയാസകരമായ സമയത്ത് സ്വകാര്യതയെ മാനിക്കണമെന്നും കുടുംബാംഗമായ അപ്സര അഭ്യർത്ഥിച്ചു.

സംഗീത ലോകത്തെ അപൂർവ്വ പ്രതിഭ

മലയാളം, തമിഴ്, തെലുങ്ക്, കന്നഡ, ഹിന്ദി ഉൾപ്പെടെ 17 ഭാഷകളിലായി നാൽപ്പതിനായിരത്തിലേറെ പാട്ടുകൾ പാടിയ അപൂർവ്വ ഗായികയാണ് ആന്ധ്രപ്രദേശ് സ്വദേശിയായ എസ്. ജാനകി. മികച്ച പിന്നണി ഗായികയ്ക്കുള്ള ദേശീയ ചലച്ചിത്ര പുരസ്കാരം 4 തവണ ഇവർക്ക് ലഭിച്ചിട്ടുണ്ട്. കേരളമടക്കമുള്ള സംസ്ഥാനങ്ങളുടെ നിരവധി പുരസ്കാരങ്ങളും നേടി. 2013-ൽ രാജ്യം പത്മഭൂഷൺ പ്രഖ്യാപിച്ചെങ്കിലും, ദക്ഷിണേന്ത്യൻ കലാകാരന്മാരോടുള്ള അവഗണനയിൽ പ്രതിഷേധിച്ച് അവർ അത് നിരസിക്കുകയായിരുന്നു. ജാനകിയുടെ വിയോഗത്തോടെ ഇന്ത്യൻ ചലച്ചിത്ര സംഗീതത്തിലെ ഒരു സുവർണ്ണ അധ്യായത്തിനാണ് അന്ത്യമാകുന്നത്.