അനുമതിയില്ലാതെ മാധ്യമങ്ങളോട് സംസാരിച്ചു; ഡോ. ബി. അശോകിനെ സസ്പെൻഡ് ചെയ്തു

സർക്കാരിന്റെ നയങ്ങളെ പരസ്യമായി വിമർശിക്കുകയും അനുമതിയില്ലാതെ മാധ്യമങ്ങളോട് സംസാരിക്കുകയും ചെയ്തതിനെത്തുടർന്ന് സൈനികക്ഷേമ വകുപ്പ് പ്രിൻസിപ്പൽ സെക്രട്ടറി ഡോ. ബി. അശോകിനെ സസ്‌പെൻഡ് ചെയ്തു. നിലവിൽ കാർഷിക സർവകലാശാല വി.സി.യുടെ അധിക ചുമതല കൂടി വഹിച്ചു വരികയായിരുന്നു അദ്ദേഹം. ചീഫ് സെക്രട്ടറി പുറത്തിറക്കിയ ഉത്തരവിലാണ് സസ്‌പെൻഷൻ നടപടി വ്യക്തമാക്കുന്നത്.

സർക്കാർ നയങ്ങളെ വിമർശിച്ചുകൊണ്ട് ചാനൽ ചർച്ചകളിൽ ഡോ. ബി. അശോക് സ്ഥിരമായി പങ്കെടുക്കാറുണ്ടായിരുന്നു. പദവിയിലിരിക്കുന്ന ഒരു ഐ.എ.എസ് ഉദ്യോഗസ്ഥൻ സർക്കാരിനെതിരെ പരസ്യമായി രംഗത്തുവരുന്നത് സർവീസ് ചട്ടങ്ങളുടെ ലംഘനമാണെന്ന് ഉത്തരവിൽ ചൂണ്ടിക്കാട്ടുന്നു. സർക്കാരിന്റെ പ്രവർത്തനങ്ങളെയും നിലപാടുകളെയും പ്രതിക്കൂട്ടിലാക്കുന്ന രീതിയിലുള്ള ഇടപെടലുകൾ അച്ചടക്കലംഘനമായാണ് അധികൃതർ വിലയിരുത്തിയത്.

സസ്‌പെൻഷൻ നടപടിയോട് പ്രതികരിച്ച ഡോ. ബി. അശോക്, സർക്കാർ മാറുന്ന സമയമായതിനാൽ ഇപ്പോൾ നിയമനടപടികൾക്ക് മുതിരുന്നില്ലെന്ന് വ്യക്തമാക്കി. മുൻപ് കെ.എസ്.ഇ.ബി ചെയർമാനായിരുന്ന സമയത്തും അദ്ദേഹം സർക്കാരുമായി വിവിധ വിഷയങ്ങളിൽ കൊമ്പുകോർത്തിരുന്നു. ഭരണതലത്തിൽ വലിയ ചർച്ചകൾക്ക് ഈ സസ്‌പെൻഷൻ നടപടി വഴിതെളിച്ചിട്ടുണ്ട്.