മദ്യനികുതി കുറയ്ക്കാനുള്ള തീരുമാനം ദുരൂഹം; യുവതലമുറയെ വഴിതെറ്റിക്കുമെന്ന് പിണറായി വിജയൻ

സംസ്ഥാനത്ത് മദ്യത്തിന്റെ നികുതി വെട്ടിക്കുറയ്ക്കാനുള്ള യു.ഡി.എഫ് സർക്കാരിന്റെ ബജറ്റ് പ്രഖ്യാപനം അങ്ങേയറ്റം ദുരൂഹമാണെന്ന് പ്രതിപക്ഷ നേതാവ് പിണറായി വിജയൻ കുറ്റപ്പെടുത്തി. ഈ നീക്കത്തിന് പിന്നിൽ മദ്യക്കമ്പനികളുടെ കച്ചവട താല്പര്യങ്ങളുണ്ടെന്ന വിമർശനം ശക്തമാണെന്നും അദ്ദേഹം പ്രസ്താവനയിൽ പറഞ്ഞു. വീര്യം കുറഞ്ഞ മദ്യമെന്ന പേരിൽ 10 ശതമാനം വരെ ആൽക്കഹോൾ അടങ്ങിയ മദ്യത്തിന്റെ നികുതി 251 ശതമാനത്തിൽ നിന്നും 120 ശതമാനമായി പകുതിയിലധികം കുറയ്ക്കാനാണ് ബജറ്റിൽ ധനമന്ത്രി നിർദ്ദേശിച്ചിരിക്കുന്നത്.

വില കുറയുമ്പോൾ വിപണിയിൽ മദ്യത്തിന്റെ ഉപയോഗം കുത്തനെ വർദ്ധിക്കുമെന്നും ഇത് ഭാവിയിൽ വീര്യം കൂടിയ മദ്യത്തിലേക്കുള്ള വഴിതുറക്കുമെന്നും പിണറായി വിജയൻ ആശങ്ക പ്രകടിപ്പിച്ചു. ജനങ്ങളുടെ ജീവൽപ്രശ്നങ്ങൾക്ക് ആശ്വാസം നൽകാത്ത സർക്കാർ, മദ്യത്തിന് മാത്രം ഇളവ് നൽകുന്നത് ആരെ സഹായിക്കാനാണെന്ന് അദ്ദേഹം ചോദിച്ചു. മദ്യ ഉപയോഗം വ്യാപകമാക്കുന്ന ഈ തീരുമാനത്തിനെതിരെ കക്ഷിരാഷ്ട്രീയത്തിനതീതമായി എല്ലാ കോണുകളിൽ നിന്നും പ്രതികരണങ്ങൾ ഉയരണമെന്നും പ്രതിപക്ഷ നേതാവ് ആവശ്യപ്പെട്ടു.

എന്നാൽ, സംസ്ഥാനത്ത് വീര്യം കുറഞ്ഞ മദ്യം എന്ന ആശയം കൊണ്ടുവന്നത് എൽ.ഡി.എഫ് സർക്കാരാണെന്ന് എക്സൈസ് മന്ത്രി എം. ലിജു മറുപടി നൽകി. 2023-ലെ നിയമഭേദഗതിയിലൂടെ വീര്യം കുറഞ്ഞ മദ്യത്തെ തരംതിരിച്ചതും, 2025-ൽ പഴവർഗ്ഗങ്ങളിൽ നിന്ന് മദ്യം ഉത്പാദിപ്പിക്കാൻ അനുമതി നൽകിയതും എൽ.ഡി.എഫ് സർക്കാരാണെന്ന് മന്ത്രി ചൂണ്ടിക്കാട്ടി. നിലവിൽ സെയിൽസ് ടാക്സുമായി ബന്ധപ്പെട്ട സാമ്പത്തിക തീരുമാനം മാത്രമാണ് ധനവകുപ്പ് എടുത്തിട്ടുള്ളതെന്നും, പുതിയ അബ്കാരി നയം നിയമസഭാ സമ്മേളനത്തിന് ശേഷം മദ്യവിരുദ്ധ സമിതികളുമായി ചർച്ച ചെയ്ത് മാത്രമേ പ്രഖ്യാപിക്കൂ എന്നും മന്ത്രി വ്യക്തമാക്കി.