വിഴിഞ്ഞം ഓഹരി കൈമാറ്റം: അദാനിയുടെ കത്തിൽ എന്ത് നടപടിയെടുത്തു? ; മുഖ്യമന്ത്രിക്ക് പിണറായി വിജയന്റെ കത്ത്

വിഴിഞ്ഞം തുറമുഖത്തിന്റെ ഓഹരി കൈമാറ്റവുമായി ബന്ധപ്പെട്ട വിവാദങ്ങളിൽ സർക്കാരിനെ ചോദ്യം ചെയ്ത് പ്രതിപക്ഷ നേതാവ് പിണറായി വിജയൻ മുഖ്യമന്ത്രി വി.ഡി. സതീശന് കത്തയച്ചു. അദാനി ഗ്രൂപ്പ് നൽകിയ കത്തിന്മേൽ സർക്കാർ ഇതുവരെ എന്ത് നടപടിയാണ് സ്വീകരിച്ചതെന്നും, ഈ വിഷയത്തിൽ നിയമോപദേശം തേടിയിട്ടുണ്ടോ എന്നും വ്യക്തമാക്കണമെന്ന് കത്തിൽ ആവശ്യപ്പെടുന്നു. തുറമുഖ കരാർ വ്യവസ്ഥകൾ കമ്പനി ലംഘിച്ചതിനെ ലാഘവത്തോടെ കാണാനാകില്ലെന്നും ഈ വിഷയത്തിൽ സർക്കാരിന്റെ മൗനം ദുരൂഹമാണെന്നും അദ്ദേഹം കുറ്റപ്പെടുത്തി.

ഓഹരി കൈമാറ്റത്തിനായി അദാനി ഗ്രൂപ്പ് സെബിക്ക് (SEBI) കത്തുനൽതിയ വിവരം പുറത്തുവന്നിട്ടും സംസ്ഥാനത്തിന്റെ ആശങ്കകൾ പരിഹരിക്കാൻ സർക്കാർ മടിക്കുകയാണെന്ന് പ്രതിപക്ഷ നേതാവ് ആരോപിച്ചു. സർക്കാരുമായുള്ള കരാർ പ്രകാരം മുൻകൂർ അനുമതി വാങ്ങാതെയും, പൂർണ്ണ വിവരങ്ങൾ വെളിപ്പെടുത്താതെയുമാണ് കമ്പനി നീക്കം നടത്തിയത്. സെബി ഇതിൽ ഏകപക്ഷീയമായി തീരുമാനമെടുക്കാൻ അവസരം നൽകരുതായിരുന്നു. ഈ വീഴ്ച കേരളത്തിന്റെ താല്പര്യങ്ങളെ ബാധിക്കുമെന്നും സർക്കാരിന്റെ ഒത്തുകളികളെ നിയമപരമായും രാഷ്ട്രീയമായും പ്രതിപക്ഷം നേരിടുമെന്നും അദ്ദേഹം വ്യക്തമാക്കി.

സംസ്ഥാന സർക്കാരിന്റെ മുൻകൂർ അനുമതിയില്ലാത്തതിനാലും സെബി റെഗുലേഷൻസ് പാലിക്കാത്തതിനാലും അദാനി ഗ്രൂപ്പിനോട് വിശദീകരണം തേടണമെന്ന് ആവശ്യപ്പെട്ട് പിണറായി വിജയൻ സെബിക്കും കത്തയച്ചിട്ടുണ്ട്. 2015-ലെ വ്യവസ്ഥകൾ പ്രകാരം ഓഹരി കൈമാറ്റം സുതാര്യമായിരിക്കണമെന്നും എല്ലാ വിവരങ്ങളും സ്റ്റോക്ക് എക്സ്ചേഞ്ചിനെ അറിയിക്കണമെന്നുമാണ് ചട്ടം. എന്നാൽ കമ്പനി കാര്യങ്ങൾ സുതാര്യമായി അറിയിച്ചിട്ടില്ലെന്നും കത്തിൽ ചൂണ്ടിക്കാണിക്കുന്നു.