'വേണ്ടത് സ്തുതിപാഠകരെയല്ല, ന്യായമില്ലാതെ മാറ്റിയതിൽ ദുഃഖം'; കോൺഗ്രസിനെ വെട്ടിലാക്കി കെ. സുധാകരൻ

ന്യായമില്ലാതെ കെ.പി.സി.സി. പ്രസിഡന്റ് സ്ഥാനത്തുനിന്ന് മാറ്റിയതിൽ അതിയായ ദുഃഖമുണ്ടെന്ന് കെ. സുധാകരൻ എം.പി. കോൺഗ്രസ് നേതൃത്വത്തെ പ്രതിരോധത്തിലാക്കി സമൂഹമാധ്യമങ്ങളിൽ പ്രചരിക്കുന്ന വീഡിയോയിലാണ് അദ്ദേഹത്തിന്റെ തുറന്നുപറച്ചിൽ. അടിപതറി നിന്ന കോൺഗ്രസ് പ്രസ്ഥാനത്തെ താൻ പ്രസിഡന്റായി ചുമതലയേറ്റ ശേഷം കഠിനാധ്വാനം ചെയ്ത് വിജയങ്ങളുടെ പാതയിലേക്ക് നയിച്ചുവെന്നും എന്നാൽ തനിക്ക് ലഭിച്ചത് അനീതിയാണെന്നും അദ്ദേഹം കുറ്റപ്പെടുത്തി.

തകർച്ചയിലായിരുന്ന പാർട്ടിയെ തെരഞ്ഞെടുപ്പുകളിൽ വൻ വിജയങ്ങളിലേക്ക് നയിച്ചത് ചരിത്രമാണെന്ന് ചൂണ്ടിക്കാട്ടിയ അദ്ദേഹം, ഒരു കാരണവുമില്ലാതെ തന്നെ മാറ്റാൻ ഒരു കൂട്ടം ആളുകൾ നീക്കം നടത്തിയപ്പോൾ വിഷമം തോന്നിയെന്നും പറഞ്ഞു. പാർട്ടിക്ക് വേണ്ടി രക്തം ചിന്തിയവരുടെയും പ്രതിസന്ധി ഘട്ടങ്ങളിൽ കൂടെനിന്നവരുടെയും അധ്വാനത്തെ വിലകുറച്ചു കാണുന്ന ഇത്തരം പ്രവർത്തികൾ കോൺഗ്രസ് പ്രസ്ഥാനത്തിന് യാതൊരു ഗുണവും ചെയ്യില്ലെന്ന് അദ്ദേഹം കൂട്ടിച്ചേർത്തു.

സർക്കാരിന്റെയും നേതൃത്വത്തിന്റെയും തെറ്റുകൾ ചൂണ്ടിക്കാണിക്കേണ്ടത് പ്രതിപക്ഷത്തിന്റെ മാത്രം ചുമതലയല്ലെന്നും ഭരണപക്ഷത്തുള്ളവർക്കും അതിനുള്ള ആർജ്ജവമുണ്ടാകണമെന്നും അദ്ദേഹം ആവശ്യപ്പെട്ടു. പ്രസ്ഥാനത്തിന് വേണ്ടത് സ്തുതിപാഠകരെയല്ല, തെറ്റ് ചൂണ്ടിക്കാണിക്കുന്ന പോരാളികളെയാണ്. അധികാരമല്ല ആദർശമാണ് വലുതെന്നും സ്ഥാനങ്ങളേക്കാൾ വലുത് പ്രസ്ഥാനമാണെന്നും വ്യക്തമാക്കിയ കെ. സുധാകരൻ, അക്രമരാഷ്ട്രീയത്തോടുള്ള തന്റെ നിലപാടിൽ മാറ്റമില്ലെന്നും വീഡിയോയിൽ കൂട്ടിച്ചേർത്തു.