ശബരിമലയിലെ വാജി വാഹനം കോടതിയിൽ ഹാജരാക്കി എസ്.ഐ.ടി; നെയ്യ് വില്പനയിലെ ക്രമക്കേടിൽ വിജിലൻസ് അന്വേഷണം

ശബരിമലയിലെ പഴയ കൊടിമരത്തിലുണ്ടായിരുന്ന വിലപ്പെട്ട 'വാജി വാഹനം' പ്രത്യേക അന്വേഷണ സംഘം (SIT) കൊല്ലം വിജിലൻസ് കോടതിയിൽ ഹാജരാക്കി. കഴിഞ്ഞ ദിവസം തന്ത്രി കണ്ഠരര് രാജീവരരുടെ വീട്ടിൽ നടത്തിയ പരിശോധനയിലാണ് പഞ്ചലോഹത്തിൽ തീർത്ത ഈ ശില്പം കണ്ടെത്തിയത്. 11 കിലോ തൂക്കം വരുന്ന ഈ വാജി വാഹനം സ്വർണ്ണം പൊതിഞ്ഞ നിലയിലുള്ളതാണ്.

2017-ലാണ് പഴയ കൊടിമരത്തിന്റെ ഭാഗമായിരുന്ന ഈ വിഗ്രഹം തന്ത്രി തന്റെ വീട്ടിലേക്ക് മാറ്റിയത്. കട്ടിളപ്പാളി കേസുമായി ബന്ധപ്പെട്ട് തന്ത്രിയെ അറസ്റ്റ് ചെയ്തതിന് പിന്നാലെ നടത്തിയ റെയ്ഡിലാണ് എസ്.ഐ.ടി ഇത് കസ്റ്റഡിയിലെടുത്തത്. നേരത്തെ വിവാദങ്ങൾ ഉയർന്നപ്പോൾ വാജി വാഹനം തിരികെ നൽകാൻ തയ്യാറാണെന്ന് തന്ത്രി ദേവസ്വം ബോർഡിനെ അറിയിച്ചിരുന്നു.

അതേസമയം, ശബരിമലയിലെ അഭിഷേകത്തിന് ശേഷമുള്ള നെയ്യ് വില്പനയിൽ നടന്ന സാമ്പത്തിക ക്രമക്കേടിൽ വിജിലൻസ് അന്വേഷണത്തിന് ഹൈക്കോടതി ദേവസ്വം ബെഞ്ച് ഉത്തരവിട്ടു. എഫ്.ഐ.ആർ രജിസ്റ്റർ ചെയ്ത് കോടതിയുടെ മേൽനോട്ടത്തിൽ അന്വേഷണം നടത്താനാണ് നിർദ്ദേശം. ഈ സീസണിൽ മാത്രം 13,679 പാക്കറ്റ് നെയ്യിന്റെ പണം ദേവസ്വം അക്കൗണ്ടിൽ എത്തിയിട്ടില്ലെന്നും ഏകദേശം 35 ലക്ഷം രൂപയുടെ വെട്ടിപ്പ് നടന്നതായും കോടതി വിലയിരുത്തി.