ഫാഷൻ ലോകത്തുനിന്ന് ബഹിരാകാശത്തേക്ക്; നാസയുടെ ചാന്ദ്രയാത്രികർക്കായി അത്യാധുനിക വസ്ത്രമൊരുക്കി 'പ്രാഡ'

ബഹിരാകാശ ഗവേഷണ രംഗത്തേക്ക് ചുവടുവെച്ച് പ്രമുഖ ഇറ്റാലിയൻ ആഡംബര ഫാഷൻ ബ്രാൻഡായ പ്രാഡ (Prada). നാസയുടെ (NASA) വരാനിരിക്കുന്ന ചാന്ദ്രദൗത്യങ്ങളിൽ ബഹിരാകാശയാത്രികർ ധരിക്കേണ്ട പ്രത്യേക വസ്ത്രത്തിന്റെ 'ഇന്നർ ലെയർ' പ്രാഡയും പ്രമുഖ സ്പേസ് കമ്പനിയായ ആക്സിയം സ്പേസും (Axiom Space) ചേർന്ന് ന്യൂയോർക്കിൽ പുറത്തിറക്കി. ഫാഷൻ ലോകത്തെ വമ്പന്മാർ ബഹിരാകാശ വ്യവസായത്തിലേക്ക് നേരിട്ട് കടന്നുവരുന്നതിന്റെ വലിയൊരു ഉദാഹരണമായാണ് ഈ നീക്കം വിലയിരുത്തപ്പെടുന്നത്.

'ലിക്വിഡ് കൂളിങ് ആൻഡ് വെന്റിലേഷൻ ഗാർമെന്റ്' (LCVG) എന്നാണ് ഈ പുതിയ ഇന്നർ ലെയർ വസ്ത്രത്തിന് പേരിട്ടിരിക്കുന്നത്. ചന്ദ്രന്റെ ഉപരിതലത്തിൽ എട്ടു മണിക്കൂർ വരെ നീളുന്ന കഠിനമായ സ്പേസ്‌വാക്കുകൾ (Spacewalks) നടത്തുമ്പോൾ യാത്രികരുടെ ശരീരതാപം കൃത്യമായി നിലനിർത്താനും സുരക്ഷ ഉറപ്പാക്കാനും ഈ വസ്ത്രം സഹായിക്കും. ശരീരത്തിലെ പ്രധാന പേശീവ്യൂഹങ്ങൾക്ക് ചുറ്റും തണുത്ത വെള്ളം നിരന്തരം സഞ്ചരിക്കുന്ന ചെറിയ ട്യൂബുകൾ ഇതിൽ ഘടിപ്പിച്ചിട്ടുണ്ട്. ഇത് ശരീരം പുറത്തുവിടുന്ന അധിക ചൂട് പൂർണ്ണമായും ആഗിരണം ചെയ്ത് പുറന്തള്ളും.

കടുത്ത ചൂടിൽ നിന്നും യാത്രികരെ സംരക്ഷിക്കുന്നതിനായി ഇതിൽ അതീവ സുരക്ഷിതമായ 'ഫുള്ളി റിഡൻഡന്റ്' കൂളിങ് സർക്യൂട്ടാണ് സജ്ജീകരിച്ചിരിക്കുന്നത്. അതായത്, പ്രാഥമിക കൂളിങ് സംവിധാനത്തിന് എന്തെങ്കിലും തകരാർ സംഭവിച്ചാൽ സ്വയം പ്രവർത്തിക്കുന്ന മികച്ചൊരു ബാക്കപ്പ് സംവിധാനം ഇതിലുണ്ട്. കൂടാതെ, വായുസഞ്ചാരത്തിനായി സജ്ജീകരിച്ചിരിക്കുന്ന മറ്റൊരു ട്യൂബ് സംവിധാനം യാത്രികരുടെ മുഖത്തേക്ക് പുതിയ ഓക്സിജൻ എത്തിക്കുകയും ശ്വസനവായുവിലെ കാർബൺ ഡൈ ഓക്സൈഡ് കൃത്യമായി നീക്കം ചെയ്യുകയും ചെയ്യും.

പ്രാഡയുടെ എഞ്ചിനീയറിങ് ഡിസൈനിങ് നൈപുണ്യവും ആക്സിയം സ്പേസിന്റെ അത്യാധുനിക ബഹിരാകാശ സാങ്കേതികവിദ്യയും സംയോജിപ്പിച്ചാണ് ഈ വസ്ത്രം രൂപകൽപ്പന ചെയ്തിരിക്കുന്നത്. മുൻപ് ഇവർ പുറത്തിറക്കിയ ഔട്ടർ സ്പേസ് സ്യൂട്ടിന്റെ തുടർച്ചയായാണ് ഈ പുതിയ ഇന്നർ ലെയർ എത്തുന്നത്. നാസയുടെ വരാനിരിക്കുന്ന ആർട്ടെമിസ് 4 (Artemis IV) ചാന്ദ്രദൗത്യത്തിലായിരിക്കും ബഹിരാകാശയാത്രികർ ഈ വസ്ത്രം ധരിക്കുക എന്നാണ് റിപ്പോർട്ടുകൾ വ്യക്തമാക്കുന്നത്. സ്പേസ് ടൂറിസം സജീവമാകുന്നതോടെ ആഡംബര ബ്രാൻഡുകൾക്ക് ബഹിരാകാശ യാത്രകളോടുള്ള താല്പര്യം വർദ്ധിക്കുന്നതായാണ് വിപണി വിദഗ്ധരുടെ വിലയിരുത്തൽ.