സൗദിയയുടെ പാസഞ്ചർ സർവീസ് സിസ്റ്റവുമായി ബന്ധം സ്ഥാപിച്ച് റിയാദ് എയർ; സഹകരണം ശക്തമാക്കും

സൗദി അറേബ്യൻ വ്യോമയാന മേഖലയിൽ പുതിയ ചരിത്രം കുറിച്ചുകൊണ്ട് റിയാദ് എയറും സൗദിയയും കൈകോർക്കുന്നു. സഹകരണ കരാറിന്റെ ആദ്യഘട്ടമെന്ന നിലയിൽ സൗദിയയുടെ പാസഞ്ചർ സർവീസ് സിസ്റ്റവുമായി റിയാദ് എയർ ബന്ധം സ്ഥാപിച്ചു. ഇരു വിമാനക്കമ്പനികൾക്കും കോഡ്ഷെയർ സംവിധാനം നടപ്പാക്കാനും യാത്രക്കാർക്ക് കൂടുതൽ യാത്രാ ഓപ്ഷനുകൾ നൽകാനും ഇത് വഴിയൊരുക്കും. സൗദിയുടെ പുതിയ ദേശീയ വിമാനക്കമ്പനിയും പബ്ലിക് ഇൻവെസ്റ്റ്മെന്റ് ഫണ്ടിന് (PIF) കീഴിലുള്ള സ്ഥാപനവുമാണ് റിയാദ് എയർ.

കരാറിന്റെ ഭാഗമായി റിയാദ് കിങ് ഖാലിദ് ഇന്റർനാഷണൽ എയർപോർട്ട് ഹബ്ബിൽ നിന്ന് അബഹ, ഖസീം, ദമ്മാം, ജിദ്ദ, മദീന, തബൂക്ക് എന്നീ ആറ് പ്രധാന ആഭ്യന്തര റൂട്ടുകളിലേക്ക് സൗദിയ നടത്തുന്ന ദൈനംദിന സർവീസുകളിൽ റിയാദ് എയറിന്റെ 'RX' കോഡ് കൂട്ടിച്ചേർക്കും. ഇതോടെ വിമാനത്താവളത്തിലെ ഒന്നു മുതൽ നാലു വരെയുള്ള ടെർമിനലുകൾ വഴി യാത്രക്കാർക്ക് ഒറ്റ ടിക്കറ്റിൽ കണക്ഷൻ സർവീസുകൾ ബുക്ക് ചെയ്യാനും അവസാന ലക്ഷ്യസ്ഥാനത്തേക്ക് നേരിട്ട് ചെക്ക്-ഇൻ പൂർത്തിയാക്കാനും സാധിക്കും.

ഇരു കമ്പനികളുടെയും നെറ്റ്‌വർക്കുകൾ വിപുലീകരിക്കുന്നതിനും രാജ്യത്തിന്റെ വിവിധ മേഖലകൾ തമ്മിലുള്ള വ്യോമ ഗതാഗത സൗകര്യങ്ങൾ കൂടുതൽ മെച്ചപ്പെടുത്തുന്നതിനും ഈ പങ്കാളിത്തം സഹായകരമാകും.