സമയനിഷ്ഠയിൽ സൗദി എയർലൈൻസ് ലോകത്ത് ഒന്നാമത്; വ്യോമയാന രംഗത്ത് ചരിത്ര നേട്ടവുമായി 'സൗദിയ'

ആഗോള വ്യോമയാന രംഗത്ത് അഭിമാനകരമായ ചരിത്ര നേട്ടം സ്വന്തമാക്കി സൗദി അറേബ്യയുടെ ദേശീയ വിമാനക്കമ്പനിയായ 'സൗദിയ' (Saudia). 2026 മെയ് മാസത്തിലെ കണക്കുകൾ പ്രകാരം വിമാനങ്ങൾ കൃത്യസമയത്ത് സർവീസ് നടത്തുന്നതിൽ (On-Time Performance) ആഗോളതലത്തിൽ ഒന്നാം സ്ഥാനം കരസ്ഥമാക്കാൻ സൗദിയക്ക് സാധിച്ചു. വ്യോമയാന രംഗത്തെ പ്രമുഖ അന്താരാഷ്ട്ര വിശകലന ഏജൻസിയായ ‌'സിറിയം' (Cirium) പുറത്തുവിട്ട ഏറ്റവും പുതിയ പ്രതിമാസ റിപ്പോർട്ടിലാണ് ഈ വിവരങ്ങളുള്ളത്.

റിപ്പോർട്ട് പ്രകാരം, മെയ് മാസത്തിൽ വിമാനങ്ങൾ കൃത്യസമയത്ത് പുറപ്പെടുന്നതിൽ (On-time departure) 92.30 ശതമാനവും, ലക്ഷ്യസ്ഥാനത്ത് എത്തുന്നതിൽ (On-time arrival) 90.12 ശതമാനവും മികച്ച സമയനിഷ്ഠ പാലിക്കാൻ സൗദിയക്ക് കഴിഞ്ഞു. ലോകത്തിലെ നാല് ഭൂഖണ്ഡങ്ങളിലായി നൂറിലധികം നഗരങ്ങളിലേക്ക് പതിമൂവായിരത്തി അറുന്നൂറിലധികം (13,669) സർവീസുകൾ വിജയകരമായി നടത്തിയാണ് എയർലൈൻസ് ഈ ആഗോള നേട്ടം കൈവരിച്ചത്.

വിശുദ്ധ ഹജ്ജ് തീർത്ഥാടന സീസണിന്റെ തുടക്കവും പെരുന്നാൾ അവധിക്കാലവും ഉൾപ്പെടെ കനത്ത യാത്രാത്തിരക്ക് അനുഭവപ്പെട്ട സമയത്താണ് സൗദിയ ഈ അസാധാരണ നേട്ടം കൈവരിച്ചതെന്നത് ശ്രദ്ധേയമാണ്. കൃത്യമായ ആസൂത്രണവും, ആധുനിക ഡിജിറ്റൽ സംവിധാനങ്ങളും, ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യയുടെ സഹായത്തോടെയുള്ള പ്രവർത്തനങ്ങളുമാണ് ഈ മികച്ച പ്രകടനത്തിന് പിന്നിലെന്ന് സൗദിയ ഗ്രൂപ്പ് അധികൃതർ വ്യക്തമാക്കി. സമയനിഷ്ഠ തങ്ങളുടെ സേവനത്തിന്റെ പ്രധാന സംസ്കാരമായി മാറ്റാൻ കഴിഞ്ഞത് യാത്രക്കാരുടെ അനുഭവം കൂടുതൽ മികച്ചതാക്കാൻ സഹായിച്ചതായും കമ്പനി അറിയിച്ചു.