ഭക്തിസാന്ദ്രമായി അനന്തപുരി; ആറ്റുകാൽ പൊങ്കാല ഇന്ന്; ഒരുക്കങ്ങൾ പൂർണം

അനന്തപുരിയുടെ കാവൽദൈവമായ ആറ്റുകാലമ്മയ്‌ക്ക് ഭക്തലക്ഷങ്ങൾ ഇന്ന് പൊങ്കാല സമർപ്പിക്കുന്നു. കുംഭ മാസത്തിലെ പൂരം നാളും പൗർണമിയും ഒത്തുചേരുന്ന ഇന്ന് രാവിലെ 9.15-ന് ശുദ്ധ പുണ്യാഹത്തോടെ ചടങ്ങുകൾ ആരംഭിക്കും. ലോകത്തിലെ ഏറ്റവും വലിയ സ്ത്രീ മുന്നേറ്റമെന്ന് അറിയപ്പെടുന്ന ഈ ചടങ്ങിൽ പങ്കെടുക്കാൻ ലക്ഷക്കണക്കിന് സ്ത്രീകളാണ് തിരുവനന്തപുരത്തും പരിസരപ്രദേശങ്ങളിലും ഒത്തുകൂടിയിരിക്കുന്നത്.

രാവിലെ 9.45-നാണ് പൊങ്കാല അടുപ്പുകൾ ജ്വലിക്കുന്നത്. ക്ഷേത്ര മേൽശാന്തി ശ്രീകോവിലിൽ നിന്ന് പകരുന്ന ദീപം തിടപ്പള്ളിയിലെ അടുപ്പിലേക്കും തുടർന്ന് സഹമേൽശാന്തി പണ്ടാര അടുപ്പിലേക്കും പകരും. ഈ ദീപം ഏറ്റുവാങ്ങിയാണ് ഭക്തർ തങ്ങളുടെ അടുപ്പുകളിൽ അഗ്നി പകരുന്നത്. ഉച്ചയ്ക്ക് 2.15-ന് നിവേദ്യ ചടങ്ങുകൾ നടക്കും. ചന്ദ്രഗ്രഹണ ദിവസമായതിനാൽ ഉച്ചകഴിഞ്ഞ് 3.10 മുതൽ രാത്രി ഏഴ് മണി വരെ ക്ഷേത്ര നട അടച്ചിടുമെന്നതിനാൽ ദർശനമുണ്ടാകില്ല.

പൊങ്കാല പ്രമാണിച്ച് വിപുലമായ സുരക്ഷാ ക്രമീകരണങ്ങളാണ് പോലീസ് ഏർപ്പെടുത്തിയിട്ടുള്ളത്. റോഡിലെ നടപ്പാതകളിൽ അടുപ്പ് കൂട്ടാൻ പാടില്ലെന്ന് കർശന നിർദേശമുണ്ട്. കെ.എസ്.ആർ.ടി.സി പ്രത്യേക സർവീസുകളും വിവിധ വകുപ്പുകളുടെ ഏകോപനത്തോടെയുള്ള മെഡിക്കൽ സൗകര്യങ്ങളും ലഭ്യമാണ്. നാളെ രാത്രി കുരുതി തർപ്പണത്തോടെ ഈ വർഷത്തെ ഉത്സവത്തിന് സമാപനമാകും.