ഡിജിറ്റൽ പ്ലാറ്റ്ഫോമുകൾ വരുമാനം പങ്കിടണം; മാധ്യമങ്ങളെ പിഴിഞ്ഞാൽ നിയമം വരുമെന്ന് കേന്ദ്രമന്ത്രി അശ്വിനി വൈഷ്ണവ്
വാർത്താ മാധ്യമങ്ങളുടെ ഉള്ളടക്കം ഉപയോഗിക്കുന്ന സോഷ്യൽ മീഡിയ, സെർച്ച് എൻജിൻ പ്ലാറ്റ്ഫോമുകൾ മാധ്യമ സ്ഥാപനങ്ങളുമായി വരുമാനം പങ്കിടണമെന്ന് കേന്ദ്ര ഐടി-വാർത്താവിനിമയ മന്ത്രി അശ്വിനി വൈഷ്ണവ്. ഡിജിറ്റൽ ന്യൂസ് പബ്ലിഷേഴ്സ് അസോസിയേഷൻ സംഘടിപ്പിച്ച കോൺക്ലേവിൽ സംസാരിക്കുകയായിരുന്നു അദ്ദേഹം. കമ്പനികൾ സ്വമേധയാ ഇതിന് തയ്യാറാകുന്നില്ലെങ്കിൽ, മറ്റു രാജ്യങ്ങളിലേതുപോലെ ഇന്ത്യയിലും നിയമനിർമ്മാണം നടത്തേണ്ടി വരുമെന്ന് മന്ത്രി മുന്നറിയിപ്പ് നൽകി.
വലിയ മാധ്യമ സ്ഥാപനങ്ങൾ മുതൽ സ്വതന്ത്ര കണ്ടന്റ് ക്രിയേറ്റർമാർ വരെ ചെയ്യുന്ന അധ്വാനത്തിന് കൃത്യമായ പ്രതിഫലം ലഭിക്കുന്നുണ്ടെന്ന് ഉറപ്പുവരുത്തേണ്ടതുണ്ട്. പ്ലാറ്റ്ഫോമുകൾ കേവലം ഒരു ഇടനിലക്കാരൻ എന്ന നിലയിൽ മാത്രം നിൽക്കാതെ ഉള്ളടക്കത്തിന്റെ ഉത്തരവാദിത്തം കൂടി ഏറ്റെടുക്കണം. ഒരാളുടെ അനുമതിയില്ലാതെ അയാളുടെ മുഖമോ ശബ്ദമോ ഉപയോഗിച്ച് നിർമ്മിതബുദ്ധി (AI) വഴി 'സിന്തറ്റിക് കണ്ടന്റ്' സൃഷ്ടിക്കുന്നത് അനുവദിക്കാനാവില്ലെന്നും അത്തരം കാര്യങ്ങളിൽ കർശനമായ അനുമതി വേണമെന്നും അദ്ദേഹം വ്യക്തമാക്കി.
പരമ്പരാഗത മാധ്യമങ്ങൾക്കും ഇൻഫ്ലുവൻസർമാർക്കും ഗവേഷകർക്കും ഒരുപോലെ ഗുണകരമാകുന്ന രീതിയിൽ ഡിജിറ്റൽ മേഖലയെ നിയന്ത്രിക്കാനാണ് സർക്കാർ ലക്ഷ്യമിടുന്നത്. മാധ്യമപ്രവർത്തകരുടെ അധ്വാനം ഡിജിറ്റൽ ഭീമന്മാർ മാത്രം ലാഭമാക്കി മാറ്റുന്ന സാഹചര്യം മാറണമെന്ന ഗൗരവകരമായ സൂചനയാണ് ഈ പ്രസ്താവനയിലൂടെ കേന്ദ്രം നൽകുന്നത്.