സാദിഖലി തങ്ങളെ അപകീർത്തിപ്പെടുത്തിയ കേസ്: പ്രതി മുഹമ്മദ് റോഷൻ പിടിയിൽ

മുസ്‌ലിം ലീഗ് സംസ്ഥാന അധ്യക്ഷൻ പാണക്കാട് സാദിഖലി ശിഹാബ് തങ്ങൾക്കെതിരെ സമൂഹമാധ്യമങ്ങളിലൂടെ അപകീർത്തികരമായ പ്രചാരണം നടത്തിയ കേസിൽ പ്രതി മുഹമ്മദ് റോഷൻ പിടിയിലായി. മലപ്പുറം അങ്ങാടിപ്പുറത്ത് വെച്ചാണ് പെരിന്തൽമണ്ണ പോലീസ് ഇയാളെ കസ്റ്റഡിയിലെടുത്തത്. നിരവധി ക്രിമിനൽ കേസുകളിൽ ഉൾപ്പെട്ടതിനെത്തുടർന്ന് നേരത്തെ കാപ്പ (KAAPA) ചുമത്തപ്പെട്ട പ്രതിയാണ് മുഹമ്മദ് റോഷൻ.

വ്യാജ ദൃശ്യങ്ങൾ കാണിച്ച് ഭീഷണിപ്പെടുത്തി സാദിഖലി തങ്ങളുടെ ബന്ധുവായ സയ്യിദ് മുഈനലി ശിഹാബ് തങ്ങളിൽ നിന്ന് 15 കോടി രൂപ തട്ടിയെടുക്കാൻ ശ്രമിച്ചതാണ് സംഭവങ്ങളുടെ തുടക്കം. തുക നൽകാൻ വിസമ്മതിച്ചതോടെയാണ് 'ഷാൻ ഷാനു' എന്ന വ്യാജ ഫേസ്ബുക്ക് പ്രൊഫൈൽ നിർമ്മിച്ച് തങ്ങൾക്കെതിരെ അധിക്ഷേപകരമായ പോസ്റ്റുകൾ ഇട്ടത്. പോസ്റ്റ് വിവാദമായതോടെ ഇയാൾ അക്കൗണ്ട് ഡിലീറ്റ് ചെയ്ത് ഒളിവിൽ പോകുകയായിരുന്നു.

മുസ്‌ലിം ലീഗ് നൽകിയ പരാതിയിൽ പെരിന്തൽമണ്ണ പോലീസ് കേസെടുത്ത് അന്വേഷണം ഊർജ്ജിതമാക്കിയിരുന്നു. സാദിഖലി തങ്ങളെ വ്യക്തിപരമായി അധിക്ഷേപിക്കാനുള്ള നീക്കത്തെ നിയമപരമായി നേരിടുമെന്ന് പി.കെ. കുഞ്ഞാലിക്കുട്ടി വ്യക്തമാക്കിയിരുന്നു. ഭാരതീയ ന്യായ സംഹിതയിലെയും ഐടി ആക്ടിലെയും വിവിധ വകുപ്പുകൾ പ്രകാരമാണ് പ്രതിക്കെതിരെ കേസെടുത്തിരിക്കുന്നത്. ഇയാളെ ചോദ്യം ചെയ്യുന്നതിലൂടെ സംഭവത്തിന് പിന്നിൽ മറ്റാർക്കെങ്കിലും പങ്കുണ്ടോ എന്ന കാര്യത്തിൽ വ്യക്തത വരുമെന്ന് പോലീസ് അറിയിച്ചു.