വിവോ അവരുടെ വിവോ വി60 സീരീസിൻറെ ഇന്ത്യൻ ടീസർ അവതരിപ്പിച്ചു

ചൈനീസ് സ്‌മാർട്ട്‌ഫോൺ ബ്രാൻഡായ വിവോ അവരുടെ വിവോ വി60 സീരീസിൻറെ ഇന്ത്യൻ ടീസർ അവതരിപ്പിച്ചു. ഓഗസ്റ്റ് മാസത്തിലാവും വിവോ വി60 5ജി മൊബൈൽ ഇന്ത്യയിൽ പുറത്തിറങ്ങുക. ZEISS Portrait So Pro ക്യാമറ സഹിതമാണ് വിവോ വിവോ 60 ഇന്ത്യയിൽ അവതരിപ്പിക്കുകയെന്ന് കമ്പനി എക്സിൽ പങ്കുവെച്ച ടീസർ പറയുന്നു. ചൈനയിൽ പുറത്തിറങ്ങിയ വിവോ എസ്30-യുടെ റീബ്രാൻഡ് വേർഷനാണ് വിവോ വി60 5ജി എന്നാണ് പ്രതീക്ഷ. വിവോ എസ്30യുടെ അതേ ഡിസൈനാണ് ഒറ്റ നോട്ടത്തിൽ വി60-നിൽ കാണുന്നത്.

ഈ വർഷം ആദ്യം വിവോ വി50 സീരീസ് കമ്പനി ഇന്ത്യയിൽ അവതരിപ്പിച്ചിരുന്നു. പിന്നാലെ വിവോ വി60 സീരീസും രാജ്യത്ത് അവതരിപ്പിക്കാനൊരുങ്ങുകയാണ്. ഇതിനായി കമ്പനി പ്രത്യേക വെബ്‌പേജ് ആരംഭിച്ചു. ഇതിൽ വിവോ വി60 5ജിയുടെ സ്ലീക്ക് സ്ലിം ഡിസൈൻ, കളർ വേരിയൻറുകൾ, ബാറ്ററി തുടങ്ങിയ ഫീച്ചറുകൾ വ്യക്തം. വി60-യിൽ ZEISS ക്യാമറ ക്യാപ്‌സൂളിനൊപ്പം രണ്ട് റിയർ സെൻസറുകൾ ഉൾപ്പെടുന്നതായാണ് ടീസറിൽ ദൃശ്യമാകുന്നത്. പിൽ ഷേപ്പിലായിരിക്കും ഈ ക്യാമറ മൊഡ്യൂൾ. ഇവ കൂടാതെ മൂന്നാമതൊരു ക്യാമറ കൂടി പിൻഭാഗത്ത് കാണാം. ഇന്ത്യൻ വിപണിക്കായി പ്രത്യേക ZEISS പോട്രൈറ്റ് ക്യാമറ മോഡുണ്ടായിരിക്കും എന്നാണ് റിപ്പോർട്ട്.

നേർത്ത ബെസ്സൽ സഹിതമുള്ള കർവ്‌ഡ് ഡിസ്‌പ്ലെ ദൃശ്യമാകുന്ന വിവോ വി60 സ്ലിം ഡിസൈനിലുള്ളതായിരിക്കും. വി60 ഈ സെഗ്മെൻറിലെ ഏറ്റവും സ്ലിമ്മായ സ്‌മാർട്ട്‌ഫോണാകാനും സാധ്യതയുണ്ട്. എന്നാൽ ഫോണിൻറെ കട്ടി എത്ര മില്ലീമീറ്ററാണ് എന്ന് കമ്പനി സ്ഥിരീകരിച്ചിട്ടില്ല. 6,500 എംഎഎച്ച് ബാറ്ററിയാണ് വിവോ വി60-യിൽ പ്രതീക്ഷിക്കുന്നത്. 90 വാട്‌സിൻറെതായിരിക്കും ഫാസ്റ്റ് ചാർജിംഗ് സൗകര്യം. മൂന്ന് നിറങ്ങളിലാവും ഫോൺ ഇന്ത്യൻ വിപണിയിലെത്തുക എന്ന് വിവോ സ്ഥിരീകരിച്ചിട്ടുണ്ട്.

ക്വാൽകോമിൻറെ പുതിയ സ്‌നാപ്‌ഡ്രാഗൺ 7 ജെൻ 4 സിലികോൺ 4nm ക്ലാസ് ചിപ്‌സെറ്റിലായിരിക്കും വിവോ വി60 പുറത്തിറങ്ങുക എന്നാണ് സൂചന. മുൻഗാമിയേക്കാൾ 27 ശതമാനം വരെ കൂടുതൽ മികവ് സിപിയു പ്രദാനം ചെയ്യുമെന്നാണ് വിവരം. സുരക്ഷയ്ക്ക് ഐപി68+69 റേറ്റിംഗ് ലഭിച്ചിട്ടുള്ളതും വിവോ വി60 വാങ്ങാനിരിക്കുന്നവരെ സന്തോഷിപ്പിക്കും. 1.5 മീറ്റർ ആഴത്തിൽ 30 മിനിറ്റ് വരെ ഈ ഫോൺ അതിജീവിക്കും എന്നാണ് സൂചന. ഓഗസ്റ്റ് രണ്ടാം വാരമാണ് വിവോ വി60 സീരീസ് ഇന്ത്യയിൽ അവതരിപ്പിക്കപ്പെടുക എന്നാണ് റിപ്പോർട്ട്. ഫോണിൻറെ കൂടുതൽ വിശദാംശങ്ങൾ വരും ദിവസങ്ങളിൽ പ്രതീക്ഷിക്കാം.