ഭൂമിക്ക് 14 അക്ക നമ്പറുമായി കേന്ദ്രം: പ്രവാസികൾക്കും വസ്തു ഉടമകൾക്കും നേട്ടം

രാജ്യത്തെ ഓരോ വസ്തുവിനും 14 അക്ക തനത് തിരിച്ചറിയൽ നമ്പർ നൽകുന്ന കേന്ദ്ര സർക്കാരിന്റെ 'ഭൂ-ആധാർ' (ULPIN - Unique Land Parcel Identification Number) പദ്ധതി നടപടികൾ വേഗത്തിലാകുന്നു. സാറ്റലൈറ്റ് അധിഷ്ഠിത അക്ഷാംശ-രേഖാംശ (Latitude & Longitude) വിവരങ്ങളും ജി.ഐ.എസ് (GIS) ഡിജിറ്റൽ ഭൂപടങ്ങളും അടിസ്ഥാനമാക്കിയാണ് ഈ നമ്പർ നിശ്ചയിക്കുന്നത്. വ്യക്തികൾക്ക് ആധാർ കാർഡ് ഉള്ളതുപോലെ ഭൂമിയുടെ കൃത്യമായ അതിർത്തികളും ഭൂമിശാസ്ത്രപരമായ സ്ഥാനവും വ്യക്തമാക്കുന്ന ഡിജിറ്റൽ ലാൻഡ് കാർഡാണിത്.

ഡിജിറ്റൽ ഇന്ത്യ ലാൻഡ് റെക്കോർഡ്സ് മോഡേണൈസേഷൻ പ്രോഗ്രാമിന്റെ (DILRMP 3.0) ഭാഗമായി നടപ്പിലാക്കുന്ന ഈ പദ്ധതിയിലൂടെ രാജ്യത്തെ ഭൂമി രജിസ്‌ട്രേഷൻ സംവിധാനം പൂർണ്ണമായും പരിഷ്‌കരിക്കപ്പെടും. ഗ്രാമങ്ങളിലെയും നഗരങ്ങളിലെയും ഭൂമി രേഖകൾ, മാപ്പുകൾ, രജിസ്‌ട്രേഷൻ വിവരങ്ങൾ എന്നിവയെല്ലാം ഒരു ഡിജിറ്റൽ പ്ലാറ്റ്‌ഫോമിലേക്ക് മാറ്റും. 2026 സെപ്റ്റംബറോടെ പദ്ധതി രാജ്യവ്യാപകമായി വ്യാപിപ്പിക്കാനാണ് സർക്കാരിന്റെ ലക്ഷ്യം. പദ്ധതിയുടെ മൂന്നാം ഘട്ടം 2026 മുതൽ 2031 വരെ നീണ്ടുനിൽക്കും. റവന്യൂ കോടതി രേഖകൾ ഭൂമി രേഖകളുമായി ബന്ധിപ്പിക്കുന്നതോടെ ഭൂമി സംബന്ധമായ കേസുകൾ വേഗത്തിൽ തീർപ്പാക്കാനും സാധിക്കും.

കേരളത്തിൽ നിലവിൽ പുരോഗമിക്കുന്ന 'എന്റെ ഭൂമി' ഡിജിറ്റൽ റീസർവേ ദൗത്യത്തിലൂടെയാകും ഭൂ-ആധാർ പദ്ധതി യാഥാർത്ഥ്യമാകുക. സംസ്ഥാനത്തെ റവന്യൂ, സർവേ, രജിസ്‌ട്രേഷൻ വകുപ്പുകളിലെ രേഖകൾ സംയോജിപ്പിച്ച് ഡിജിറ്റൽ സർവേ പൂർത്തിയാകുന്ന മുറയ്ക്ക് ഓരോ വസ്തുവിനും 14 അക്ക നമ്പർ നൽകും. ഇതോടെ ഭൂമി വാങ്ങുമ്പോഴും വിൽക്കുമ്പോഴും അതിന്റെ പൂർവ്വകാല വിവരങ്ങൾ, യഥാർത്ഥ അവകാശികൾ, അതിർത്തികൾ എന്നിവ കൃത്യമായി അറിയാൻ കഴിയും. വ്യാജ ആധാരങ്ങൾ ഉണ്ടാക്കൽ, ഒരേ ഭൂമി ഒന്നിലധികം പേർക്ക് വിൽക്കൽ, അതിർത്തി കയ്യേറ്റങ്ങൾ എന്നിവ തടയാൻ ഭൂ-ആധാർ സഹായിക്കും. പ്രത്യേകിച്ച് പ്രവാസികൾക്കും നാട്ടിലുള്ള വസ്തു ഉടമകൾക്കും തങ്ങളുടെ ഭൂമി സുരക്ഷിതമാണെന്ന് ഓൺലൈനായി എളുപ്പത്തിൽ ഉറപ്പാക്കാനും ഇത് ഉപകരിക്കും. പദ്ധതി നടപ്പിലാക്കുന്നതിന് മുന്നോടിയായി നിലവിലുള്ള ആധാരം, പട്ടയം, കരമടച്ച രസീത് എന്നിവയിലെ വിവരങ്ങളും പേരുകളും കൃത്യമാണോ എന്ന് ഉടമകൾ മുൻകൂട്ടി ഉറപ്പുവരുത്തേണ്ടതുണ്ട്.