തൻറെ യുട്യൂബ് ചാനൽ ഔദ്യോഗികമായി പ്രഖ്യാപിച്ച് ബോളിവുഡ് താരം ആമിർ ഖാൻ. ആമിർ ഖാൻ പ്രൊഡക്ഷൻസിൻറെ സിനിമകൾ തിയറ്റർ റിലീസിന് ശേഷം പ്രദർശിപ്പിക്കുക ഇനി ഈ യുട്യൂബ് ചാനലിലൂടെ ആയിരിക്കും. ആമിർ ഖാൻ ടോക്കീസ് എന്നാണ് ചാനലിൻറെ പേര്. ജനങ്ങളുടെ തിയറ്റർ (ജൻതാ കാ തിയറ്റർ) എന്ന വിശേഷണത്തോടെയാണ് യുട്യൂബ് ചാനൽ അവതരിപ്പിച്ചിരിക്കുന്നത്. ആമിർ ഖാൻറെ ഏറ്റവും പുതിയ ചിത്രം സിതാരെ സമീൻ പർ ആയിരിക്കും ചാനലിലൂടെയുള്ള ആദ്യ റിലീസ്. ഓഗസ്റ്റ് 1 നാണ് ചിത്രത്തിൻറെ യുട്യൂബ് സ്ട്രീമിംഗ് ആരംഭിക്കുക. ഒടിടി റിലീസ് ഒഴിവാക്കിയാണ് തിയറ്റർ റിലീസിന് ശേഷം ചിത്രം യുട്യൂബിലേക്ക് എത്തുന്നത്. സിതാരെ സമീൻ പർ റിലീസിന് മുൻപ് ആമിർ ഖാൻ അറിയിച്ചിരുന്ന കാര്യമാണ് ഇത്.

കാണുന്നതിന് പണം നൽകുന്ന പേ പെർ വ്യൂ മാതൃകയിൽ ആയിരിക്കും സിതാരെ സമീൻ പർ സിനിമയുടെ യുട്യൂബ് റിലീസ്. ചിത്രം കാണാൻ 100 രൂപയാണ് മുടക്കേണ്ടത്. 100 രൂപ മുടക്കുന്ന ആൾക്ക് രണ്ട് ദിവസത്തെ ആക്‌സസ് (48 മണിക്കൂർ) ആയിരിക്കും ലഭിക്കുക. മുംബൈയിൽ നടത്തിയ വാർത്താ സമ്മേളനത്തിലാണ് ആമിർ ഖാൻ വിപ്ലവകരമായ പ്രഖ്യാപനം നടത്തിയത്. ഇന്ത്യയ്‌ക്കൊപ്പം യുഎസ്എ, കാനഡ, യുകെ, ഓസ്‌ട്രേലിയ, ജർമനി, ഇന്തോനേഷ്യ, ഫിലിപ്പീൻസ്, സിംഗപ്പൂർ, സ്‌പെയിൻ തുടങ്ങിയ രാജ്യങ്ങളിലും യുട്യൂബിലൂടെ ചിത്രം ലഭ്യമായിരിക്കും. അതത് രാജ്യങ്ങൾക്ക് അനുസൃതമായിട്ടാവും തുക. സബ്‌ടൈറ്റിലുകളോടൊപ്പം പ്രധാന ഭാഷകളിലെ മൊഴിമാറ്റ പതിപ്പുകളും ലഭ്യമായിരിക്കും.

പല കാരണങ്ങളാൽ തിയറ്ററുകളിലേക്ക് എത്താനാവാത്ത ജനങ്ങളിലേക്ക് സിനിമകൾ എത്തിക്കണമെന്നത് കഴിഞ്ഞ 15 വർഷമായി തൻറെ ഉള്ളിൽ ഉണ്ടായിരുന്ന ആഗ്രഹമായിരുന്നെന്നും അതിനുള്ള ശരിയായ സമയം ഇതാണെന്നും ആമിർ ഖാൻ പറഞ്ഞു. ഇൻറർനെറ്റ് ലഭ്യതയും യുപിഐ പണമിടപാടുകളുടെ ജനകീയതയുമാണ് ഇത് സാധ്യമാക്കിയതെന്നും ആമിർ ഖാൻ പറഞ്ഞു.

സിതാരെ സമീൻ പർ ഒരു തുടക്കം മാത്രമാണ്. കാലക്രമത്തിൽ ആമിർ ഖാൻ പ്രൊഡക്ഷൻസിൻറെ മുഴുവൻ സിനിമകളും ഇവിടെ ലഭ്യമാകും. അതിൽ ചില ഉള്ളടക്കങ്ങൾ സൗജന്യമായി കാണാനാവുന്ന തരത്തിലുമായിരിക്കും. ആമിർ ഖാൻ അവതാരകനാവുന്ന സത്യമേവ ജയതേ പോലുള്ള ഷോകൾ ചാനലിൽ സൗജന്യമായി കാണാനാവും. ആമിർ ഖാൻറെ അച്ഛൻ താഹിർ ഹുസൈൻറെ ചിത്രങ്ങളും പിന്നീട് ഈ യുട്യൂബ് ചാനലിലേക്ക് എത്തും. ഇൻഡിപെൻഡൻറ് ഫിലിം മേക്കേഴ്‌സിനും തങ്ങളുടെ ചിത്രങ്ങൾ പ്രദർശിപ്പിക്കാൻ പുതിയ പ്ലാറ്റ്‌ഫോമിലൂടെ അവസരം നൽകുമെന്നും ആമിർ ഖാൻ പറഞ്ഞു.