'ജന നായകൻ' 250 കോടിയിലേക്ക്; കേരളത്തിൽ നിന്ന് നേടിയത് 14 കോടി

തമിഴ്‌നാട് മുഖ്യമന്ത്രിയായ ശേഷമുള്ള വിജയ്‌യുടെ ചിത്രം 'ജന നായകൻ' ബ്ലോക്ക്ബസ്റ്റർ വിജയത്തിലേക്ക്. ചിത്രം ആഗോളതലത്തിൽ 250 കോടിയിലധികം കളക്ഷൻ നേടിയപ്പോൾ കേരളത്തിൽ നിന്ന് മാത്രം 14 കോടിയോളം ഗ്രോസ് കളക്ഷൻ സ്വന്തമാക്കി.

പ്രവൃത്തിദിനമായ തിങ്കളാഴ്ചയും തിയേറ്ററുകളിൽ വൻ തിരക്കാണ് അനുഭവപ്പെട്ടത്. പ്രായഭേദമന്യേ പ്രേക്ഷകർ തങ്ങളുടെ പ്രിയതാരത്തെ സ്ക്രീനിൽ കാണാൻ തിയേറ്ററുകളിലേക്ക് എത്തുന്നുണ്ട്. പ്രതിസന്ധികൾ മറികടന്ന് ബോക്സ് ഓഫീസിൽ വൻ വിജയമാകുന്ന ചിത്രം ഇന്ത്യയിലൊട്ടാകെ ഇതിനകം 5.8 മില്യൺ ടിക്കറ്റുകൾ വിറ്റഴിച്ചു.

എച്ച്. വിനോദ് സംവിധാനം ചെയ്ത ചിത്രം കെ.വി.എൻ പ്രൊഡക്ഷൻസിന്റെ ബാനറിൽ വെങ്കട്ട് കെ. നാരായണയാണ് നിർമ്മിച്ചത്. ബോബി ഡിയോൾ, പൂജ ഹെഗ്ഡെ, മമിത ബൈജു, പ്രകാശ് രാജ്, ഗൗതം വാസുദേവ് മേനോൻ, പ്രിയാമണി തുടങ്ങിയ പ്രമുഖ താരനിര ചിത്രത്തിൽ അണിനിരക്കുന്നുണ്ട്.