കാർത്തിക് സുബ്ബരാജിന്റെ 'ദൊറോത്തി' ഒടിടിയിലേക്ക്; നെറ്റ്ഫ്‌ലിക്‌സിൽ ഒക്ടോബർ 23 മുതൽ
തമിഴകത്ത് വിവാദങ്ങൾക്കൊപ്പം നിരൂപക പ്രശംസയും നേടിയ കാർത്തിക് സുബ്ബരാജ് ചിത്രം 'ദൊറോത്തി' ഒടിടിയിലേക്ക്. തിയറ്റർ റിലീസിന് നാലാഴ്ചയ്ക്ക് ശേഷമാണ് ചിത്രം നെറ്റ്ഫ്‌ലിക്‌സിൽ സ്ട്രീം ചെയ്യുന്നത്. ഒക്ടോബർ 23 മുതൽ ചിത്രം പ്രേക്ഷകർക്ക് കാണാം.
90-കളിലെ മധുരൈയുടെ പശ്ചാത്തലത്തിൽ, പുരുഷാധിപത്യ കുടുംബത്തിലെ ഒരു ട്രാൻസ്ജെൻഡർ വ്യക്തിയുടെ ജീവിതമാണ് സിനിമയുടെ പ്രമേയം. ചിത്രത്തിലെ ചുംബനരംഗം ചോർന്നത് വലിയ വിവാദത്തിന് വഴിവെച്ചിരുന്നു. നാടിന്റെ സംസ്‌കാരം നശിപ്പിക്കുന്നതാണ് സിനിമയെന്നായിരുന്നു ഒരു വിഭാഗത്തിന്റെ ആരോപണം. ചിത്രം പ്രോത്സാഹിപ്പിക്കരുതെന്ന് ആവശ്യപ്പെട്ട് #BoycottDorothy എന്ന ഹാഷ്ടാഗും എക്‌സിൽ വ്യാപകമായി പ്രചരിച്ചിരുന്നു.
കാർത്തിക് സുബ്ബരാജ് രചനയും സംവിധാനവും നിർവഹിച്ച ചിത്രത്തിൽ കീർത്തി സുരേഷാണ് ടൈറ്റിൽ കഥാപാത്രത്തെ അവതരിപ്പിക്കുന്നത്. ഋഷികാന്ത്, സനന്ദ് എന്നിവരും പ്രധാന വേഷങ്ങളിലെത്തുന്നു. മണിരത്‌നം ഉൾപ്പെടെയുള്ള പ്രമുഖർ ചിത്രത്തെ പ്രശംസിച്ചിരുന്നു