'തത്ത്വമസി': ഏറ്റവും വേഗത്തിൽ നിർമ്മാണം പൂർത്തിയാക്കിയ ചിത്രമെന്ന റെക്കോർഡ് സ്വന്തമാക്കി
ആവിഷ്കാര ഡിജിറ്റൽ ബാനറിൽ പൂനെ ഫിലിം ഇൻസ്റ്റിറ്റ്യൂട്ട് ബിരുദധാരിയായ രഘുനാഥ് എൻ ബി രചനയും സംവിധാനവും നിർവഹിച്ച് നിർമ്മിക്കുന്ന പുതിയ ചിത്രമാണ് 'തത്ത്വമസി'. ഏറ്റവും വേഗത്തിൽ നിർമ്മാണം പൂർത്തിയാക്കിയ ചിത്രം - ഷൂട്ട് ടു സ്ക്രീൻ - എന്ന ഒരു ലോക റെക്കോർഡിനു വേണ്ടിയിട്ടുള്ള ഒരു പരിശ്രമം കൂടിയാണ് ഈ ചിത്രം.
വെറും 13 മണിക്കൂർ കൊണ്ടാണ് ഒരു മുഴുനീള സിനിമ പൂർത്തിയാക്കിയത്. ഒക്ടോബർ ഇരുപത്തിയൊന്നാം തീയതി കാലത്ത് പത്തുമണിക്ക് ചിത്രീകരണം ആരംഭിച്ച 'തത്ത്വമസി' എന്ന സിനിമയാണ് വൈകുന്നേരം 11:40ന് ഓ ടി ടി പ്ലാറ്റ്ഫോമിലൂടെ ഡിജിറ്റൽ റിലീസിംഗ് പൂർത്തിയാക്കി ലോക സിനിമയിൽ പുതിയ അധ്യായം എഴുതി ചേർത്തത്.
ഒരു കോടതിയിൽ നടക്കുന്ന കേസ് വിസ്താരവും അതിനോടനുബന്ധിച്ച സംഭവങ്ങളുമാണ് ഈ ചിത്രത്തിൽ ദൃശ്യവൽക്കരിക്കുന്നത്. ഡിജിറ്റൽ ബാനറിൽ, പൂനെ ഫിലിം ഇൻസ്റ്റിറ്റ്യൂട്ട് ബിരുദധാരിയായ രഘുനാഥ് എൻ ബി രചനയും സംവിധാനവും നിർവഹിച്ച് നിർമിച്ച 'തത്ത്വമസി' എന്ന സിനിമയിൽ കണ്ടുപരിചിതമായ പതിവ് കോടതി രംഗങ്ങളിൽ നിന്നും വിഭിന്നമാണ് അവതരിപ്പിക്കുന്നത്. പലപ്പോഴും സിനിമയ്ക്കുവേണ്ടി വികൃതമാക്കപ്പെട്ട കോടതിയിലെ വാദപ്രതിവാദങ്ങൾ ഒട്ടും തനിമ നഷ്ടപ്പെടാതെ കോടതിയുടെ സിനിമ അവതരണത്തിന് ഒരു പുതിയ ഭാഷ്യം നൽകുകയാണ് ഈ സിനിമയിലൂടെ സംവിധായകൻ ചെയ്തിരിക്കുന്നത്. ജില്ലാ കോടതികളിലും മറ്റും പ്രാക്ടീസ് ചെയ്യുന്ന അഭിഭാഷകരും ഡോക്ടർമാരും അതുപോലെയുള്ള നിരവധി പുതുമുഖങ്ങളുമാണ് ഈ ചിത്രത്തിലെ കഥാപാത്രങ്ങളെ അവതരിപ്പിക്കുന്നത്.
ഒന്നേമൂക്കാൽ മണിക്കൂർ ദൈർഘ്യമുള്ള "തത്ത്വമസി", മൈ ഓ ടി ടി മലയാളം എന്ന വെബ്സൈറ്റിലൂടെയും, മൈ ഓ ടി ടി മലയാളം എന്ന ആൻഡ്രോയിഡ് ആപ്പ് ഗൂഗിൾ പ്ലേ സ്റ്റോറിൽ നിന്നും ഡൗൺലോഡ് ചെയ്തും പ്രേക്ഷകർക്ക് കാണാവുന്നതാണ്. യു ആർ എഫ് വേൾഡ് റെക്കോർഡ്, വേർഡ്സ് ഗ്രേറ്റസ് റെക്കോർഡ് തുടങ്ങിയ അംഗീകാരങ്ങൾ ഈ സിനിമയ്ക്ക് ഇതിനോടകം തന്നെ ലഭിച്ചു കഴിഞ്ഞു.
ഇതിന് മുമ്പ് രഘുനാഥ് രചനയും സംവിധാനവും നിർവഹിച്ച 'നിശബ്ദം' എന്ന ചിത്രത്തിന്, ഒരു ചിത്രത്തിന് ഒരു വ്യക്തി ചെയ്യുന്ന ഏറ്റവും കൂടുതൽ ക്രെഡിറ്റുകൾ - 30 ക്രെഡിറ്റുകൾ - എന്ന യൂണിവേഴ്സൽ റെക്കോർഡ് ഫോറത്തിന്റെ വേൾഡ് റെക്കോർഡിനും അർഹമായിട്ടുണ്ട്. ഈ ചിത്രത്തിന് നിരവധി ദേശീയ അന്തർദേശീയ അംഗീകാരങ്ങളും നിരവധി ചലച്ചിത്രമേളകളിലേക്ക് സെലക്ഷനും ലഭിച്ചിട്ടുണ്ട്. കൃഷ്ണപ്രഭയായിരുന്നു ചിത്രത്തിലെ നായിക.