അബുദാബി മിന സെയ്ദ് കാർപെറ്റ് മാർക്കറ്റിൽ തീപിടുത്തം; ആളപായമില്ല

അബുദാബിയിലെ പ്രശസ്തമായ മിന സെയ്ദ് (Zayed Port) കാർപെറ്റ് മാർക്കറ്റിൽ വൻ തീപിടുത്തം. വ്യാഴാഴ്ച രാത്രിയോടെയാണ് മാർക്കറ്റിലെ കടകൾക്ക് തീപിടിച്ചത്. സിവിൽ ഡിഫൻസ് വിഭാഗത്തിന്റെ കൃത്യമായ ഇടപെടലിനെത്തുടർന്ന് വൻ ദുരന്തം ഒഴിവായി. അപകടത്തിൽ ആർക്കും പരിക്കേറ്റതായി റിപ്പോർട്ടില്ല.

തീപിടുത്തമുണ്ടായ ഉടൻ തന്നെ അബുദാബി സിവിൽ ഡിഫൻസ് സംഘം സ്ഥലത്തെത്തി രക്ഷാപ്രവർത്തനം ആരംഭിക്കുകയും വളരെ വേഗത്തിൽ തന്നെ തീ നിയന്ത്രണവിധേയമാക്കുകയും ചെയ്തു. പുക ഉയർന്നതിനെത്തുടർന്ന് സുരക്ഷാ മുൻകരുതലിന്റെ ഭാഗമായി പ്രദേശത്തേക്കുള്ള ഗതാഗതം താൽക്കാലികമായി നിയന്ത്രിച്ചിരുന്നു.

ഷോർട്ട് സർക്യൂട്ടാണ് അപകടത്തിന് കാരണമെന്നാണ് പ്രാഥമിക നിഗമനം. തീപിടുത്തത്തെത്തുടർന്നുണ്ടായ നാശനഷ്ടങ്ങളുടെ വ്യാപ്തി തിട്ടപ്പെടുത്തി വരികയാണെന്ന് അധികൃതർ അറിയിച്ചു.