യുഎഇയിൽ വരും ദിവസങ്ങളിൽ കാലാവസ്ഥ പൊതുവെ സുസ്ഥിരമായിരിക്കുമെങ്കിലും താപനിലയിൽ ക്രമാനുഗതമായ വർധനവിന് സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം (എൻസിഎം) അറിയിച്ചു. ഈ മാസം 28 വരെ രാജ്യത്തിന്റെ മിക്ക ഭാഗങ്ങളിലും ഈ സാഹചര്യം തുടരും.വെള്ളിയാഴ്ച മുതൽ മിക്ക ദിവസങ്ങളിലും ആകാശം തെളിഞ്ഞതോ ഭാഗികമായി മേഘാവൃതമായോ കാണപ്പെടും. കിഴക്കൻ പ്രദേശങ്ങളിൽ ഇടയ്ക്കിടെ മേഘങ്ങൾ രൂപപ്പെടാൻ സാധ്യതയുണ്ട്. വരാനിരിക്കുന്ന ഞായറാഴ്ച തീരദേശങ്ങളിലും ദ്വീപുകളിലും മേഘാവൃതമായ അന്തരീക്ഷം പ്രകടമായേക്കാം. വടക്കൻ മേഖലകളിൽ ചില സമയങ്ങളിൽ കൂടുതൽ മേഘങ്ങൾ പ്രത്യക്ഷപ്പെട്ടേക്കാമെന്നും കാലാവസ്ഥാ നിരീക്ഷണ കേന്ദ്രം വ്യക്തമാക്കുന്നു.

രാജ്യത്ത് നേരിയതോ മിതമായതോ ആയ കാറ്റിനാണ് സാധ്യത. എന്നാൽ ചില സമയങ്ങളിൽ കാറ്റ് ശക്തമാകുന്നത് പൊടിപടലങ്ങൾ ഉയരാൻ കാരണമായേക്കാം. ഇത് ദൂരക്കാഴ്ചയെ ബാധിക്കാൻ സാധ്യതയുള്ളതിനാൽ വാഹനയാത്രികർ ജാഗ്രത പാലിക്കണം. കടൽ പൊതുവെ ശാന്തമായിരിക്കുമെങ്കിലും അറേബ്യൻ ഗൾഫിൽ ചില സമയങ്ങളിൽ കടൽ പ്രക്ഷുബ്ധമാകാൻ സാധ്യതയുണ്ട്.