ജല- വൈദ്യുതി നിരക്ക് വർധിപ്പിക്കില്ലെന്ന ഇലക്ട്രിസിറ്റി ആൻഡ് വാട്ടർ അതോറിറ്റിയുടെ (ദീവ) പ്രഖ്യാപനം ദുബായിൽ താമസിക്കുന്ന വിദേശികൾക്കും സ്വദേശികൾക്കും ആശ്വാസവാർത്തയായി. ജീവിത ചെലവുകൾ വർധിച്ചുവരുന്ന സാഹചര്യത്തിൽ പ്രഖ്യാപനം സാധാരണക്കാർക്കു വലിയ ആശ്വാസമാണു പകരുന്നത്.നിലവിലുള്ള താരിഫ് നിരക്കുകൾ തന്നെ തുടരുമെന്ന് ദീവ ചീഫ് എക്സിക്യൂട്ടീവ് ഓഫിസർ വ്യക്തമാക്കി. നിരക്ക് വർധനയെക്കുറിച്ചുള്ള അഭ്യൂഹങ്ങൾ പരക്കുന്നതിനിടയിലാണു വിശദീകരണം. നിരക്ക് കൂട്ടുന്നതിനല്ല, മറിച്ചു സേവനങ്ങളുടെ ഗുണനിലവാരം ഉയർത്താനും സ്മാർട്ട് സംവിധാനങ്ങൾ വഴി ജനങ്ങൾക്കു കൂടുതൽ സൗകര്യങ്ങൾ ഒരുക്കാനുമാണ് അതോറിറ്റി മുൻഗണന നൽകുന്നത്.

നിരക്ക് വർധിപ്പിക്കാതെ തന്നെ, ഊർജ ഉപഭോഗം കുറയ്ക്കാനും സൗരോർജം പോലുള്ള പുനരുപയോഗ ഊർജ സ്രോതസ്സുകൾ പ്രോത്സാഹിപ്പിക്കാനും ദീവ ശ്രദ്ധ കേന്ദ്രീകരിക്കുന്നു. നഗരത്തിന്റെ വികസനവും ജനങ്ങളുടെ ജീവിതനിലവാരവും മുൻനിർത്തി, അനാവശ്യ സാമ്പത്തിക ഭാരം ജനങ്ങളിൽ അടിച്ചേൽപിക്കേണ്ടതില്ല എന്ന കാഴ്ചപ്പാടാണു ദീവയ്ക്കെന്നും സൂചിപ്പിച്ചു.