പശ്ചിമേഷ്യൻ സംഘർഷത്തിന്റെ അലയൊലികൾക്കിടെ ഇന്ത്യ– ഒമാൻ സ്വതന്ത്ര വ്യാപാരക്കരാർ (എഫ്ടിഎ) ഇന്നലെ പ്രാബല്യത്തിലായി.

ഇതോടെ ഒമാനിലേക്കുള്ള ഇന്ത്യൻ കയറ്റുമതിയുടെ 99.38 ശതമാനവും തീരുവരഹിതമായി. മുൻപ് ഇന്ത്യൻ കയറ്റുമതിയുടെ 15.33 ശതമാനത്തിനു മാത്രമാണ് തീരുവയിളവുണ്ടായിരുന്നത്. ഇന്ത്യയിലേക്ക് ഒമാനിൽ നിന്ന് എത്തുന്ന 94.81% കയറ്റുമതിക്കും തീരുവയിളവ് നൽകും. പല ഉൽപന്നങ്ങളും ക്വോട്ട അടിസ്ഥാനത്തിലും മിനിമം ഇറക്കുമതി വില നിശ്ചയിച്ചുമാണ് ഇളവ്. ഒമാൻ ഈന്തപ്പഴത്തിന് തീരുവ കുറയുമെന്നതിനാൽ ഇന്ത്യയിൽ വില കുറയും.

ഒമാനുമായുള്ള വ്യാപാരത്തിനു പുറമേ, മറ്റു രാജ്യങ്ങളിലേക്കുള്ള വ്യാപാരത്തിനുള്ള സുരക്ഷിതമായ കവാടം കൂടിയാണ് ഇന്ത്യയ്ക്കു തുറന്നുകിട്ടുന്നത്.