തങ്ങളുടെ രണ്ട് എണ്ണക്കപ്പലുകൾക്ക് നേരെ ഹോർമുസ് കടലിടുക്കിൽ ഇറാൻ നടത്തിയ മിസൈൽ ആക്രമണത്തെ അതീവ ഗൗരവത്തോടെ കാണുന്നതായും സംഭവത്തെ ശക്തമായി അപലപിക്കുന്നതായും യുണൈറ്റഡ് അറബ് എമിറേറ്റ്സ് (UAE) വിദേശകാര്യ മന്ത്രാലയം അറിയിച്ചു. ആഗോള ഊർജ്ജ വിതരണ ശൃംഖലയെ തകിടം മറിക്കാനും അന്താരാഷ്ട്ര സമുദ്ര സുരക്ഷയെ അപകടത്തിലാക്കാനും ലക്ഷ്യമിട്ടുള്ള നഗ്നമായ പ്രകോപനമാണ് ഇറാൻ നടത്തിയതെന്ന് യുഎഇ വ്യക്തമാക്കി.

ഒരു ഇന്ത്യൻ നാവികന്റെ മരണത്തിനിടയാക്കിയ ഈ ആക്രമണം അന്താരാഷ്ട്ര നാവിക നിയമങ്ങളുടെ ലംഘനമാണെന്ന് ചൂണ്ടിക്കാട്ടി യുഎഇ വിദേശകാര്യ, അന്താരാഷ്ട്ര സഹകരണ മന്ത്രാലയം ഔദ്യോഗിക പ്രസ്താവന പുറത്തിറക്കുകയായിരുന്നു.