നാരുകൾ അമിതമായാൽ അപകടം: എന്താണ് ഫൈബർ മാക്‌സിങ്?

നാരുകൾ (ഫൈബർ) അടങ്ങിയ ഭക്ഷണം കഴിക്കുന്നത് ദഹനത്തിനും ആരോഗ്യകരമായ ശരീരഭാരം നിലനിർത്തുന്നതിനും അത്യന്താപേക്ഷിതമാണ്. എന്നാൽ ശരീരഭാരം പെട്ടെന്ന് കുറയ്ക്കുന്നതിനായി പലരും ഇപ്പോൾ പിന്തുടരുന്ന ഒരു രീതിയാണ് 'ഫൈബർ മാക്‌സിങ്' (Fibre Maxxing) അഥവാ നാരുകൾ അടങ്ങിയ ഭക്ഷണം അമിതമായി കഴിക്കുന്നത്. നാരുകൾ ശരീരത്തിന് സ്വയം ഉത്പാദിപ്പിക്കാൻ കഴിയാത്തതുകൊണ്ട്, ഭക്ഷണത്തിലൂടെ ഇവ കണ്ടെത്തേണ്ടത് അത്യാവശ്യമാണ്. ദഹനം ഉൾപ്പെടെയുള്ള പല സുപ്രധാന ശാരീരിക പ്രക്രിയകൾക്കും നാരുകൾ പ്രധാന പങ്ക് വഹിക്കുന്നു.

എന്താണ് 'ഫൈബർ മാക്‌സിങ്'?

ഭക്ഷണത്തിലൂടെയും ഫൈബർ സപ്ലിമെന്റുകളുടെ സഹായത്തോടെയും ശരീരത്തിലെ നാരുകളുടെ അളവ് വലിയ തോതിൽ വർദ്ധിപ്പിക്കുക. ഇതിലൂടെ മൊത്തത്തിലുള്ള ആരോഗ്യം മെച്ചപ്പെടുത്താനും ശരീരഭാരം വേഗത്തിൽ കുറയ്ക്കാനും ലക്ഷ്യമിടുന്ന ഒരു വൈറൽ ട്രെൻഡാണ് 'ഫൈബർ മാക്‌സിങ്'.

സുരക്ഷിതമാണോ ഈ രീതി?

ഇത്തരം ട്രെൻഡുകൾക്ക് പിന്നാലെ പോകുന്നത് ആരോഗ്യത്തിന് തിരിച്ചടിയായേക്കാമെന്ന് പോഷകാഹാര വിദഗ്ധയായ മാമി അഗർവാൾ മുന്നറിയിപ്പ് നൽകുന്നു. നാരുകൾ ശരീരത്തിന് പരമപ്രധാനമാണ്. ഇത് കൊളസ്‌ട്രോൾ, രക്തത്തിലെ പഞ്ചസാരയുടെ അളവ്, ദഹനം, വിശപ്പ് എന്നിവയെ നിയന്ത്രിക്കാൻ സഹായിക്കും. എന്നാൽ, കുറഞ്ഞ സമയം കൊണ്ട് കൂടുതൽ നാരുകൾ ശരീരത്തിലെത്തുന്നത് ഗുണത്തെക്കാൾ ദോഷമാണ് ചെയ്യുക.

'ഫൈബർ മാക്‌സിങ്' രീതിയിൽ ഒരു ദിവസം ഏകദേശം 30 മുതൽ 60 ഗ്രാം വരെ അധിക നാരുകളാണ് ശരീരത്തിൽ എത്തുന്നത്. ശരിയായ രീതിയിൽ വെള്ളം കുടിക്കാതെ നാരുകൾ അമിതമായി കഴിക്കുന്നത് ദഹനപ്രശ്നങ്ങൾക്ക് കാരണമാകും. നാരുകളുടെ അളവ് ക്രമേണ വർദ്ധിപ്പിക്കുന്നതാണ് നല്ലതെന്നും, അതോടൊപ്പം ശരീരത്തിൽ ജലാംശം ശരിയായ രീതിയിൽ നിലനിർത്തണമെന്നും അവർ നിർദ്ദേശിക്കുന്നു.

ഫൈബർ മാക്‌സിങ് ഉണ്ടാക്കാവുന്ന ആരോഗ്യ പ്രശ്നങ്ങൾ:

• ബ്ലോട്ടിങ് (വയറുവീർക്കൽ)

• മലബന്ധം

• ഗ്യാസ്

• പോഷകാഹാര കുറവ്

• നിർജ്ജലീകരണം (Dehydration)

നാരുകൾ അമിതമായി കഴിക്കുമ്പോൾ, അതിനോട് പൊരുത്തപ്പെടാൻ ശരീരം കൂടുതൽ സമയം എടുക്കേണ്ടി വരും. ഇത് ഫലപ്രദമാകില്ലെന്ന് മാത്രമല്ല, ഒരാഴ്ച കൊണ്ട് 10 ഗ്രാമിൽ നിന്ന് 50 ഗ്രാമിലേക്ക് നാരുകളുടെ അളവ് വർദ്ധിപ്പിക്കുന്നത് അപകടകരവുമാണ്.

നാരുകൾ എങ്ങനെ സുരക്ഷിതമായി ഡയറ്റിൽ ചേർക്കാം?

• നാരുകളുടെ അളവ് രണ്ട് അല്ലെങ്കിൽ മൂന്ന് ആഴ്ചകൾ കൊണ്ട് ക്രമേണ മാത്രം വർദ്ധിപ്പിക്കാൻ ശ്രമിക്കുക.

• ദഹനം മെച്ചപ്പെടുത്തുന്നതിന്, ദിവസവും 2.5 മുതൽ 3 ലിറ്റർ വരെ വെള്ളം കുടിക്കുക.

• ലയിക്കുന്ന (ചിയ, ഓട്‌സ്, പയറുവർഗ്ഗം) ലയിക്കാത്ത (ഗോതമ്പ്, പച്ചക്കറികൾ) നാരുകൾ സംയോജിപ്പിച്ചു ഡയറ്റിൽ ഉൾപ്പെടുത്തുക.

• പഴങ്ങൾ, പച്ചക്കറികൾ, മുഴുവൻ ധാന്യങ്ങൾ, പയറുവർഗ്ഗങ്ങൾ എന്നിവ കഴിക്കുന്നതിന് മുൻഗണന നൽകുക.

• ദിവസവും 25-38 ഗ്രാമിൽ കുറഞ്ഞ നാരുകൾ മാത്രം കഴിക്കാൻ ശ്രമിക്കുക.