പങ്കാളിയുമായി ഇക്കാര്യങ്ങളിൽ യോജിക്കാൻ സാധിക്കുന്നുണ്ടോ?; എങ്കിൽ ബന്ധം നീണ്ടുനിൽക്കും ഉറപ്പ്
പുതിയൊരു ജീവിതത്തിന്റെ തുടക്കമാണ് ഓരോ സ്‌നേഹബന്ധവും. പങ്കാളികൾ തമ്മിൽ കൃത്യമായ ഇഴയടുപ്പം ഓരോ ബന്ധത്തിനും വിജയത്തിന് അത്യാവശ്യമാണ്. വിവാഹ ശേഷമോ, ബന്ധം ആരംഭിച്ച ശേഷമോ താഴെപറയുന്ന തരത്തിൽ പെരുമാറ്റം പങ്കാളികൾ തമ്മിലുണ്ടെങ്കിൽ ആ ബന്ധം ദീർഘനാൾ നിലനിൽക്കുമെന്ന് ഉറപ്പാണ്. അവ പാലിക്കാൻ ശ്രമിക്കേണ്ടത് വളരെ അത്യാവശ്യമാണ്.
അദ്യനാളുകളിലെ സന്തോഷമെല്ലാം കഴിഞ്ഞ് ജീവിതം കഠിനമായിത്തുടങ്ങുമ്പോഴും മിക്ക കാര്യങ്ങളിലും പ്രശ്‌നങ്ങളില്ലാതെ മുന്നോട്ട് പോകാനാകുന്നുവെങ്കിൽ നിങ്ങൾ ഉറപ്പിച്ചോളൂ. ഇതുതന്നെ നിങ്ങൾക്കുവേണ്ടി പിറന്ന ജീവിതപങ്കാളി.
വ്യക്തികൾ എന്ന നിലയിൽ ഇരുവർക്കും പ്രയാസങ്ങളുണ്ടാകാം. ഈ സമയം ഞാൻ നിന്റെയൊപ്പമുണ്ട് എന്ന തോന്നൽ പങ്കാളികൾക്ക് പരസ്‌പരം നൽകാനായാൽ ആ ബന്ധം മുന്നോട്ടുപോകുമ്പോൾ മികവുറ്റതാകും എന്നാണർത്ഥം.
തന്റെ ഭൂതകാലത്തിൽ സംഭവിച്ച പ്രശ്‌നങ്ങളും കൗതുകങ്ങളും എല്ലാം പങ്കാളിയോട് തുറന്നുപറയാൻ സാധിക്കുകയും അതിൽ തെറ്റിദ്ധാരണ ഇല്ലാതിരിക്കുകയും ചെയ്‌താൽ അവർ നല്ല പങ്കാളികൾ ആണെന്ന് ഉറപ്പിക്കാം. ഇതിലൂടെ തമ്മിൽ സ്വഭാവം മനസിലാക്കി കൂടുതൽ പിന്തുണ നൽകി മുന്നോട്ടുപോകാൻ കഴിയും.
പങ്കാളിയ്‌ക്ക് ലഭിക്കുന്ന ചെറിയ വിജയങ്ങൾ പോലും ആഘോഷിക്കാൻ സാധിക്കുമെങ്കിൽ അത് നല്ല ലക്ഷണമാണ്. അവരുടെ സന്തോഷം നിങ്ങൾക്കും സന്തോഷം നൽകുന്നെങ്കിൽ നല്ല ഇഴയടുപ്പം തമ്മിലുണ്ടെന്ന് അർത്ഥം.
പലപ്പോഴും ജീവിതത്തിൽ തെറ്റുകളോ തെറ്റിദ്ധാരണകളോ സംഭവിക്കാം. പക്ഷെ എന്തുതന്നെയായാലും പങ്കാളിയ്‌ക്ക് അത് വിഷമമുണ്ടാക്കിയെങ്കിൽ ക്ഷമ ചോദിക്കാനും തിരുത്താൻ വഴി കണ്ടെത്താനും സാധിക്കുമെങ്കിൽ നല്ലതാണ്.
ഒന്നിച്ചുള്ള ജീവിതം മെച്ചപ്പെടാൻ നിർദ്ദേശം നൽകുകയും അതോടൊപ്പം പങ്കാളിയുടെ നിർദ്ദേശങ്ങൾ കേൾക്കുകയും ചെയ്യേണ്ടത് അത്യാവശ്യമാണ്. ചെറുപ്പത്തിൽ തന്നെ ഈ ശീലമുണ്ടെങ്കിൽ നല്ല ദമ്പതികളാകും നിങ്ങളെന്നതിൽ സംശയമില്ല.
മറ്റൊന്ന് ഇരുവരുടെയും താൽപര്യമാണ്. ഓരോ വ്യക്തിക്കും ഓരോ താൽപര്യങ്ങളാണ് ഉള്ളത്. ഇരുവരും ഒരേ താൽപര്യങ്ങൾ പങ്കുവയ്‌ക്കുകയാണെങ്കിൽ ജീവിതം എളുപ്പമാകും. ഇത് നല്ല ഇഴയടുപ്പം തനിയെ സൃഷ്‌ടിക്കും.
പുറമേയും കിടപ്പറയിലും പല കാര്യങ്ങളിലും ദമ്പതികൾക്കിടയിൽ അഭിപ്രായ വ്യത്യാസം വരാം. എന്നാൽ ഏതുകാര്യം പറയുമ്പോഴും പരസ്‌പര ബഹുമാനം നഷ്‌ടമാകാതെ അവ നിലനിർത്തി പോകാൻ ഇരുവർക്കും സാധിക്കുന്നെങ്കിൽ ആ ബന്ധം ശക്തമാണ് എന്നാണ് അർത്ഥം.