കറിവേപ്പ് മുരടിയ്ക്കുന്നുവോ?; വേരിൽ ഈ വളം, നന്നായി വളരാൻ ഈ കാര്യങ്ങൾ ശ്രദ്ധിക്കാം
വീട്ടിൽ ഒഴിവാക്കാനാവാത്ത ഒന്നായിരിക്കും കറിവേപ്പില. ഏത് കറിയാണെങ്കിലും അതിലൽപം കറിവേപ്പ് താളിയ്ക്കുന്നത് നമ്മുടെ ശീലങ്ങളിൽ ഒന്നാണ്. ആരോഗ്യ ഗുണങ്ങളും സൗന്ദര്യ ഗുണങ്ങളും ആവോളം അടങ്ങിയിട്ടുള്ള ഒന്നാണ് കറിവേപ്പ് എന്ന കാര്യത്തിൽ സംശയം വേണ്ട.
എന്നാൽ കറിവേപ്പ് വെയ്ക്കുന്നവർക്ക് പലപ്പോഴും തലവേദന ഉണ്ടാക്കുന്ന ഒരു പ്രശ്നമാണ് കീടങ്ങളുടെ ആക്രമണം. ഇല മുറിഞ്ഞ് പോവുക, ഇലകളിൽ നിറം മാറ്റം സംഭവിയ്ക്കുക, പുതിയ മുള പൊട്ടാതിരിയ്ക്കുക എന്നിവയെല്ലാം കറിവേപ്പിന്റെ വളർച്ചയെ പ്രതികൂലമായി ബാധിയ്ക്കുന്ന ഒന്നാണ്.
എന്നാൽ ഇനി കറിവേപ്പിന്റെ ഇത്തരത്തിലുള്ള എല്ലാ പ്രശ്നങ്ങളേയും ഇല്ലാതാക്കാൻ സഹായിക്കുന്ന ചില മാർഗ്ഗങ്ങളുണ്ട്.
പുളിച്ച കഞ്ഞി വെള്ളം
പുളിച്ച കഞ്ഞിവെള്ളം നല്ലൊരു പ്രതിവിധിയാണ്. പുളിച്ച കഞ്ഞിവെള്ളത്തിൽ ഇരട്ടി വെള്ളം ചേർത്ത് കരിവേപ്പിനു മുകളിൽ തളിയ്ക്കുന്നത് കീടങ്ങളുടെ ആക്രമണത്തിൽ നിന്ന് കറിവേപ്പിനെ സംരക്ഷിക്കുന്നു.
തളിരിലകൾക്ക്
പുതിയ തളിരിലകൾ ഉണ്ടാവാനും കഞ്ഞിവെള്ളം തന്നെ മുന്നിൽ. കറിവേപ്പിനു ചുവട്ടിൽ കഞ്ഞിവെള്ളം ഒഴിയ്ക്കുന്നത് തളിരിലകൾ കറിവേപ്പിൽ ഉണ്ടാവാൻ സഹായിക്കുന്നു. മാത്രമല്ല കഞ്ഞിവെള്ളത്തിന്റെ മണം കീടങ്ങളെ അകറ്റുകയും ചെയ്യുന്നു.
വെള്ളം
ഒരിക്കലും കറിവേപ്പിനു താഴെ വെള്ളം കെട്ടിക്കിടക്കാൻ സമ്മതിയ്ക്കരുത്. ഈർപ്പം അത്യാവശ്യമാണെങ്കിലും വെള്ളം കെട്ടിക്കിടക്കുന്നത് വേര് അഴുകാൻ കാരണമാകുന്നു.
ചാരം
ഇലകളിലുണ്ടാകുന്ന കുത്തുകളും നിറം മാറ്റവും ഇല്ലാതാക്കുന്നതിനും നല്ല ആരോഗ്യമുള്ള ഇലകൾ ലഭിയ്ക്കുന്നതിനും ചാരം വിതറുന്നത് നല്ലതാണ്. ഇത് ഇലകളിലും ചെടിയുടെ ചുവട്ടിലും വിതറാവുന്നതാണ്.
ഇല പറിയ്ക്കുമ്പോൾ
കറിവേപ്പ് എങ്ങനെ പറിച്ചെടുക്കണമെന്ന് പലർക്കും അറിയില്ല. ഇത് വളർച്ചയെ മുരടിപ്പിക്കുന്നു. കറിവേപ്പിന്റെ ഇല മാത്രമായി പറിച്ചെടുക്കാതെ തണ്ടോടു കൂടിയായിരിക്കണം പറിച്ചെടുക്കേണ്ടത്. ഇത് പുതിയ ശിഖരങ്ങൾ പറിച്ചെടുത്ത ഭാഗത്ത് ഉണ്ടാവാൻ കാരണമാകുന്നു.
ചെടി ഉയരം വെയ്ക്കരുത്
ഇത്തരത്തിൽ ഇലകൾ തണ്ടോടു കൂടി പറിച്ചെടുക്കുമ്പോൾ ചെടി അധികം ഉയരത്തിൽ വളരുന്നില്ല. ഇതാണ് കറിവേപ്പിന്റെ വളർച്ചയ്ക്ക് നല്ലതും.
വളങ്ങൾ
വിവിധ തരത്തിലുള്ള വളങ്ങൾ കറിവേപ്പിന്റെ വളർച്ചയ്ക്ക് ഉപയോഗിക്കാം. പച്ചച്ചാണകവും കടലപ്പിണ്ണാക്കും മിക്സ് ചെയ്ത് വേരിനു ചുറ്റും ഒഴിച്ച് കൊടുക്കാം. ഇത് ഇല വളരാനും ഈർപ്പത്തിനും കാരണമാകുന്നു.