ദീപാവലി ആഘോഷത്തിന് പിന്നാലെ ഡൽഹിയിൽ വായുമലിനീകരണം രൂക്ഷം

ദീപാവലി രാത്രിയിൽ നിരോധനം ലംഘിച്ച് വ്യാപകമായി പടക്കങ്ങൾ പൊട്ടിച്ചതിന് പിന്നാലെ ഡൽഹിയിൽ വായുമലിനീകരണം അതിരൂക്ഷമായി. നഗരത്തിന്റെ വിവിധ ഭാഗങ്ങളിൽ കനത്ത പുകമഞ്ഞ് രൂപപ്പെട്ടതോടെ കാഴ്ചാപരിധി കുറഞ്ഞു. കണ്ണെരിച്ചിൽ, തൊണ്ടവേദന തുടങ്ങിയ ആരോഗ്യപ്രശ്‌നങ്ങളും ജനങ്ങളെ അലട്ടിത്തുടങ്ങി.

തിങ്കളാഴ്ച രാവിലെ ഡൽഹിയിലെ ശരാശരി വായുനിലവാര സൂചിക (എക്യുഐ) 370 ആയി ഉയർന്നു. ഇതോടെ വായുനിലവാരം 'വളരെ മോശം' വിഭാഗത്തിലെത്തി. ഡൽഹി ടെക്‌നോളജിക്കൽ യൂണിവേഴ്‌സിറ്റി (ഡിടിയു), ബുരാരി ക്രോസിങ് തുടങ്ങിയ നിരീക്ഷണ കേന്ദ്രങ്ങളിൽ എക്യുഐ 437 രേഖപ്പെടുത്തി. ബവാന, ജഹാംഗീർപുരി, സോണിയ വിഹാർ തുടങ്ങിയ പ്രദേശങ്ങളിലും വായുനിലവാരം ഗുരുതര വിഭാഗത്തിലാണ്.

സ്വിസ് വായുനിലവാര നിരീക്ഷണ പ്ലാറ്റ്‌ഫോമായ ഐക്യുഎയറിന്റെ കണക്കുകൾ പ്രകാരം ഡൽഹിയിലെ പിഎം 2.5 മലിനീകരണത്തിന്റെ തോത് ലോകാരോഗ്യ സംഘടനയുടെ വാർഷിക മാർഗനിർദേശ പരിധിയേക്കാൾ 34 മടങ്ങ് കൂടുതലാണ്.

പടക്കങ്ങളിൽ നിന്നുള്ള പുകയും പ്രതികൂല കാലാവസ്ഥയും കാറ്റിന്റെ വേഗം കുറയുന്നതുമാണ് മലിനീകരണം രൂക്ഷമാകാൻ കാരണമായത്. മണിക്കൂറിൽ 10 കിലോമീറ്ററിൽ താഴെയാണ് കാറ്റിന്റെ വേഗം. ഇതോടെ മലിനവായു അന്തരീക്ഷത്തിൽ തങ്ങിനിൽക്കുന്ന സാഹചര്യമാണുള്ളത്.

വരും ദിവസങ്ങളിലും ഡൽഹിയിൽ വായുനിലവാരം മോശമായി തുടരാനാണ് സാധ്യതയെന്നാണ് മുന്നറിയിപ്പ്. മലിനീകരണം നിയന്ത്രിക്കാനുള്ള നടപടികൾക്കൊപ്പം ജനങ്ങൾ ആരോഗ്യസംരക്ഷണത്തിലും പ്രത്യേക ജാഗ്രത പുലർത്തേണ്ട സാഹചര്യമാണ് നിലവിലുള്ളത്.