കാവേരി ജലതർക്കം: തമിഴ്നാടിന്റെ 11 ടിഎംസി വെള്ളത്തിനായുള്ള ഹർജി തള്ളി സുപ്രീം കോടതി

 

ദശകങ്ങളായി തുടരുന്ന കാവേരി നദീജല തർക്കത്തിൽ തമിഴ്നാട് സർക്കാരിന് തിരിച്ചടി. കർണാടകയിൽ നിന്ന് 11 ടിഎംസി വെള്ളം വിട്ടുനൽകാൻ നിർദേശിക്കണമെന്നാവശ്യപ്പെട്ട് തമിഴ്നാട് സമർപ്പിച്ച അപേക്ഷ സുപ്രീം കോടതി തള്ളി.

മഴക്കുറവുള്ള വർഷമായിരുന്നിട്ടും, കർണാടകയിൽ നിന്ന് അനുവദിച്ച ജലവിഹിതത്തിൽ 11.719 ടിഎംസി വെള്ളത്തിന്റെ കുറവുണ്ടെന്നാണ് തമിഴ്നാടിന്റെ ആരോപണം. ഈ വെള്ളം വിട്ടുനൽകാൻ കർണാടകയ്ക്ക് നിർദേശം നൽകണമെന്നായിരുന്നു ഹർജിയിലെ ആവശ്യം.

എന്നാൽ, വരൾച്ചയും നീരൊഴുക്കിലെ കുറവും ചൂണ്ടിക്കാട്ടി കർണാടക തമിഴ്നാടിന്റെ ആവശ്യം എതിർത്തു. കാവേരി വാട്ടർ മാനേജ്‌മെന്റ് അതോറിറ്റിയുടെ നിർദേശങ്ങൾ പാലിച്ചാണ് സംസ്ഥാനം പ്രവർത്തിക്കുന്നതെന്നും തമിഴ്നാടിന്റെ ആരോപണങ്ങൾ അടിസ്ഥാനരഹിതമാണെന്നും കർണാടക വ്യക്തമാക്കി.