തുടർച്ചയായ സർവീസ് മുടക്കം; സ്പൈസ് ജെറ്റിന് ഡിജിസിഎയുടെ കാരണം കാണിക്കൽ നോട്ടീസ്, ഏഴ് ദിവസത്തിനകം മറുപടി നൽകണം

 

വിമാന സർവീസുകൾ തുടർച്ചയായി റദ്ദാക്കുകയും വൈകുകയും ചെയ്യുന്ന സാഹചര്യത്തിൽ സ്വകാര്യ വിമാനക്കമ്പനിയായ സ്പൈസ് ജെറ്റിന് ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) നോട്ടീസ് നൽകി. നവംബർ 17-ന് പുറപ്പെടുവിച്ച നോട്ടീസിൽ ഏഴ് ദിവസത്തിനകം വിശദീകരണം നൽകണമെന്നാണ് നിർദ്ദേശിച്ചിരിക്കുന്നത്. കമ്പനിയുടെ ഭൂരിഭാഗം വിമാനങ്ങളും അംഗീകൃത സമയക്രമം പാലിക്കുകയോ കൃത്യമായി സർവീസ് നടത്തുകയോ ചെയ്യുന്നില്ലെന്ന് കണ്ടെത്തിയതിനെത്തുടർന്നാണ് നടപടി. വ്യോമയാന ചട്ടങ്ങളുടെ തുടർച്ചയായ ലംഘനം, അടിക്കടിയുണ്ടാകുന്ന സർവീസ് തടസ്സങ്ങൾ, കുടിശ്ശികകളും പിഴകളും അടയ്ക്കുന്നതിലെ വീഴ്ച എന്നിവ ചൂണ്ടിക്കാട്ടിയാണ് ഡിജിസിഎ കർശന നടപടിയിലേക്ക് കടന്നിരിക്കുന്നത്.

നവംബർ 19-ലെ കണക്കുകൾ പ്രകാരം സ്പൈസ് ജെറ്റിന്റെ കേവലം 25 ശതമാനം വിമാനങ്ങൾ മാത്രമാണ് കൃത്യസമയത്ത് സർവീസ് നടത്തിയത്; മറ്റു പ്രമുഖ ഇന്ത്യൻ വിമാനക്കമ്പനികളുടെ സമയകൃത്യത 80 ശതമാനത്തിന് മുകളിലായിരിക്കുമ്പോഴാണ് സ്പൈസ് ജെറ്റിന്റെ ഈ ദയനീയ പ്രകടനം. കഴിഞ്ഞ ഏതാനും ദിവസങ്ങളായി കമ്പനി തങ്ങളുടെ 50 ശതമാനത്തിലധികം വിമാനങ്ങളും റദ്ദാക്കുന്നുണ്ടെന്നാണ് പ്രധാന വിമാനത്താവളങ്ങളിൽ നിന്നും ഫ്ലൈറ്റ് ട്രാക്കിംഗ് വെബ്‌സൈറ്റുകളിൽ നിന്നും ലഭിക്കുന്ന വിവരങ്ങൾ വ്യക്തമാക്കുന്നത്. രൂക്ഷമായ സാമ്പത്തിക പ്രതിസന്ധിയിലൂടെ കടന്നുപോകുന്ന കമ്പനിയുടെ ഭൂരിഭാഗം വിമാനങ്ങളും നിലവിൽ സർവീസ് നടത്താനാകാതെ നിലത്തിറക്കിയിരിക്കുകയാണ്. പിഴത്തുകയും നിർബന്ധിത ഇൻഷുറൻസ് പുതുക്കൽ തുകയും ഉൾപ്പെടെയുള്ള ബാധ്യതകൾ തീർക്കാൻ പോലും കമ്പനിക്ക് സാധിക്കുന്നില്ലെന്നും റിപ്പോർട്ടുകളുണ്ട്.

2019-ൽ ഏകദേശം 15 ശതമാനം ആഭ്യന്തര വിപണി വിഹിതവുമായി രാജ്യത്തെ രണ്ടാമത്തെ വലിയ വിമാനക്കമ്പനിയായിരുന്ന സ്പൈസ് ജെറ്റ്, കോവിഡ് മഹാമാരിക്ക് ശേഷമാണ് കടുത്ത പ്രതിസന്ധിയിലേക്ക് വീണത്. ഈ വർഷം ജനുവരിയിൽ ഏകദേശം നാല് ശതമാനമായിരുന്ന കമ്പനിയുടെ ആഭ്യന്തര വിപണി വിഹിതം ഒക്ടോബറോടെ വെറും 0.6 ശതമാനത്തിലേക്ക് കൂപ്പുകുത്തുകയും നവംബറിൽ പ്രതിസന്ധി കൂടുതൽ വഷളാവുകയും ചെയ്തു. നിലവിലെ സാമ്പത്തിക ഞെരുക്കം മറികടക്കുന്നതിനായി ഏകദേശം 5,500 കോടി രൂപ സമാഹരിക്കാനുള്ള ശ്രമങ്ങൾ സ്പൈസ് ജെറ്റ് മാനേജ്‌മെന്റ് ആരംഭിച്ചിട്ടുണ്ട്. അതേസമയം, ഒരു വിമാനക്കമ്പനി പ്രതിസന്ധിയിലാകുന്നതോടെ ആ റൂട്ടുകളിലെ മറ്റു വിമാനക്കമ്പനികൾ ടിക്കറ്റ് നിരക്കുകൾ കുത്തനെ ഉയർത്തുന്നത് സാധാരണക്കാരായ യാത്രക്കാർക്ക് വലിയ സാമ്പത്തിക ഭാരമാണ് സൃഷ്ടിക്കുന്നത്.