വനിതാ സംവരണ ബില്ലിന്റെ പേരില് കേന്ദ്ര സര്ക്കാര് വീണ്ടും രാഷ്ട്രീയ നാടകം കളിക്കുകയാണെന്ന് സിപിഎം
Apr 10, 2026, 15:55 IST
വനിതാ സംവരണ ബില്ലിന്റെ പേരില് കേന്ദ്ര സര്ക്കാര് വീണ്ടും രാഷ്ട്രീയ നാടകം കളിക്കുകയാണെന്ന് സിപിഎം പോളിറ്റ് ബ്യൂറോ. പാര്ലമെന്റിലും നിയമസഭകളിലും സ്ത്രീകള്ക്ക് മൂന്നിലൊന്ന് സീറ്റുകള് ഉറപ്പാക്കുന്ന നിയമ നിര്മാണം നിയമസഭാ തെരഞ്ഞെടുപ്പുകള് നടക്കുന്ന സാഹചര്യത്തില് രാഷ്ട്രീയ നേട്ടം മാത്രം ലക്ഷ്യമിട്ടാണ്. സംവരണത്തെ സെന്സസുമായും മണ്ഡല പുനര്നിര്ണ്ണയവുമായും ബന്ധിപ്പിക്കാനുള്ള നീക്കം സ്ത്രീകളുടെ അവകാശം അനിശ്ചിതമായി വൈകിപ്പിക്കുമെന്നും പോളിറ്റ് ബ്യൂറോ പ്രസ്താവനയില് കുറ്റപ്പെടുത്തി.പാര്ലമെന്റിലും നിയമസഭകളിലും സീറ്റുകളുടെ എണ്ണംകൂട്ടി സ്ത്രീകള്ക്ക് 33 ശതമാനം സംവരണം ഉറപ്പാക്കുന്ന ബില്ലിന് കേന്ദ്രമന്ത്രിസഭ അംഗീകാരം നല്കിയ സാഹചര്യത്തിലാണ് പ്രതികരണം. വനിതാ സംവരണത്തിന് സിപിഎം എന്നും പ്രതിജ്ഞാബദ്ധമാണ്. അതുകൊണ്ടാണ് കഴിഞ്ഞ വര്ഷം ചില നിര്ദ്ദേശങ്ങളില് വിയോജിപ്പുണ്ടായിട്ടും ബില്ലിനെ പിന്തുണച്ചതെന്നും പാര്ട്ടി വ്യക്തമാക്കി. പ്രതിപക്ഷ പാര്ട്ടികളുമായി യാതൊരു കൂടിയാലോചനയും നടത്താതെയാണ് കേന്ദ്രം പുതിയ പരിഷ്കാരങ്ങള് കൊണ്ടുവരുന്നത്. സര്വ്വകക്ഷി യോഗം വിളിക്കണമെന്ന ആവശ്യം കേന്ദ്രം അവഗണിച്ചു. 2011-ലെ സെന്സസ് അടിസ്ഥാനമാക്കി മണ്ഡല പുനര്നിര്ണ്ണയം നടത്തി സീറ്റുകളുടെ എണ്ണം വര്ദ്ധിപ്പിക്കാനുള്ള നീക്കം ഗൗരവകരമായ ചര്ച്ചകള് ആവശ്യമുള്ള വിഷയമാണ്. എല്ലാ സംസ്ഥാനങ്ങളുമായും രാഷ്ട്രീയ പാര്ട്ടികളുമായും ഇക്കാര്യത്തില് വിപുലമായ സംവാദം വേണമെന്നും പോളിറ്റ് ബ്യൂറോ ആവശ്യപ്പെട്ടു.