അസമിലും മികച്ച പോളിങ്; ഉച്ചവരെ 59.63 ശതമാനം പോളിങ്
അസം നിയമസഭാ തിരഞ്ഞെടുപ്പിന്റെ വോട്ടെടുപ്പിൽ കനത്ത പോളിങ്. കേന്ദ്ര തിരഞ്ഞെടുപ്പ് കമ്മീഷന്റെ ഏറ്റവും പുതിയ കണക്കുകൾ പ്രകാരം സംസ്ഥാനത്ത് ഉച്ചയ്ക്ക് ഒരു മണി വരെ 59.63 ശതമാനം വോട്ടർമാർ സമ്മതിദാനാവകാശം വിനിയോഗിച്ചു. രാവിലെ മുതൽ തന്നെ ബൂത്തുകളിൽ വോട്ടർമാരുടെ നീണ്ട നിരയാണ് കാണപ്പെടുന്നത്. പലയിടങ്ങളിലും കനത്ത ആവേശം ദൃശ്യമാണെന്നും തിരഞ്ഞെടുപ്പ് കമ്മീഷൻ അറിയിച്ചു.
ഭരണത്തുടർച്ച ലക്ഷ്യമിടുന്ന എൻഡിഎയും ഭരണം തിരിച്ചുപിടിക്കാൻ ശ്രമിക്കുന്ന കോൺഗ്രസ് നേതൃത്വത്തിലുള്ള സഖ്യവും തമ്മിൽ ശക്തമായ പോരാട്ടമാണ് അസമിൽ നടക്കുന്നത്. മുഖ്യമന്ത്രി ഹിമന്ത ബിശ്വ ശർമ്മയുടെ നേതൃത്വത്തിൽ മൂന്നാം തവണയും അധികാരം നിലനിർത്താമെന്ന ആത്മവിശ്വാസത്തിലാണ് ബിജെപി. 126 മണ്ഡലങ്ങളിലേക്കും ഒറ്റഘട്ടമായാണ് വോട്ടെടുപ്പ് നടക്കുന്നത്. മുഖ്യമന്ത്രി ഹിമന്ത ബിശ്വ ശർമ്മ തന്റെ മണ്ഡലമായ ജലൂക്ബാരിയിൽ രാവിലെ തന്നെ വോട്ട് രേഖപ്പെടുത്തി. കോൺഗ്രസ് അധ്യക്ഷൻ ഗൗരവ് ഗൊഗോയ് ഉൾപ്പെടെയുള്ള പ്രമുഖ നേതാക്കളും ആദ്യ മണിക്കൂറുകളിൽ തന്നെ ബൂത്തുകളിലെത്തി.
സംസ്ഥാനത്തുടനീളം കനത്ത സുരക്ഷയാണ് വോട്ടെടുപ്പിനോടനുബന്ധിച്ച് ഒരുക്കിയിരിക്കുന്നത്. തിരഞ്ഞെടുപ്പ് പൂർണ്ണമായും സമാധാനപരമാണെന്നും ഇതുവരെ പരാതികളൊന്നും റിപ്പോർട്ട് ചെയ്തിട്ടില്ലെന്നും അധികൃതർ വ്യക്തമാക്കി. വോട്ടെടുപ്പ് അവസാനിക്കുമ്പോഴേക്കും പോളിങ് ശതമാനം റെക്കോർഡിലെത്തുമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.