ഹരിയാൻവി നടി ദിവ്യാങ്ക സിരോഹി അന്തരിച്ചു; വിടവാങ്ങൽ 30-ാം വയസ്സിൽ

പ്രശസ്ത ഹരിയാൻവി നടിയും സോഷ്യൽ മീഡിയ താരവുമായ ദിവ്യാങ്ക സിരോഹി (30) അന്തരിച്ചു. ഗാസിയാബാദിലെ രാജ്‌നഗർ എക്സ്റ്റൻഷനിൽ താമസിച്ചിരുന്ന താരത്തിന്റെ അപ്രതീക്ഷിത വിയോഗം ഹരിയാൻവി സിനിമാ-സംഗീത ലോകത്തെ ഞെട്ടിച്ചിരിക്കുകയാണ്. മരണകാരണം സംബന്ധിച്ച് ഔദ്യോഗിക സ്ഥിരീകരണം ഇതുവരെ ലഭ്യമായിട്ടില്ല.

ചൊവ്വാഴ്ച രാത്രിയോടെ ദിവ്യാങ്കയുടെ ആരോഗ്യനില പെട്ടെന്ന് വഷളാകുകയായിരുന്നു. ഉടൻ തന്നെ കുടുംബാംഗങ്ങൾ ആശുപത്രിയിൽ എത്തിച്ചെങ്കിലും അവിടെ എത്തുന്നതിന് മുൻപ് തന്നെ മരണം സംഭവിച്ചതായി ഡോക്ടർമാർ സ്ഥിരീകരിച്ചു. ഉത്തർപ്രദേശിലെ ബുലന്ദ്ഷഹറിൽ ജനിച്ച ദിവ്യാങ്ക, ഹരിയാൻവി സംഗീത ആൽബങ്ങളിലൂടെയാണ് ശ്രദ്ധിക്കപ്പെട്ടത്. അമ്പതിലധികം ഹിറ്റ് ഗാനങ്ങളിൽ താരം വേഷമിട്ടിട്ടുണ്ട്. പ്രശസ്ത ഗായകൻ മാസൂം ശർമ്മയോടൊപ്പമുള്ള സംഗീത വീഡിയോകൾ ഏറെ ജനപ്രിയമായിരുന്നു.

അഭിനയത്തിന് പുറമെ ഡിജിറ്റൽ രംഗത്തും സജീവമായിരുന്ന ദിവ്യാങ്കയ്ക്ക് ഇൻസ്റ്റാഗ്രാമിൽ മാത്രം 13 ലക്ഷത്തിലധികം (1.3 Million) ഫോളോവേഴ്സ് ഉണ്ടായിരുന്നു. ഗാസിയാബാദിലെ മോക്ഷ സ്ഥൽ ഹിന്ദനിൽ വെച്ച് നടന്ന അന്ത്യകർമ്മങ്ങൾക്ക് സഹോദരൻ ഹിമാൻഷു സിറോഹി നേതൃത്വം നൽകി. താരത്തിന്റെ വിയോഗത്തിൽ ആരാധകരും സഹപ്രവർത്തകരും സോഷ്യൽ മീഡിയയിലൂടെ അനുശോചനം രേഖപ്പെടുത്തി.