അന്ന് ബി.ജെ.പിയിൽ ചേർന്നത് വലിയ തെറ്റ്; നടി പർണോ മിത്ര തൃണമൂൽ കോൺഗ്രസിൽ ചേർന്നു

പ്രമുഖ ബംഗാളി നടി പർണോ മിത്ര ബി.ജെ.പി വിട്ട് തൃണമൂൽ കോൺഗ്രസിൽ (TMC) ചേർന്നു. സംസ്ഥാന ധനകാര്യമന്ത്രി ചന്ദ്രിമ ഭട്ടാചാര്യ, ജയപ്രകാശ് മജുംദാർ തുടങ്ങിയ മുതിർന്ന നേതാക്കളുടെ സാന്നിധ്യത്തിലാണ് താരം പാർട്ടി അംഗത്വം സ്വീകരിച്ചത്. ആറ് വർഷം മുൻപ് ബി.ജെ.പിയിൽ ചേർന്ന പർണോ മിത്ര, 2021-ലെ നിയമസഭാ തെരഞ്ഞെടുപ്പിൽ ബി.ജെ.പി സ്ഥാനാർത്ഥിയായി മത്സരിച്ചിരുന്നു. എന്നാൽ കുറച്ചുകാലമായി സജീവ രാഷ്ട്രീയത്തിൽ നിന്ന് വിട്ടുനിൽക്കുകയായിരുന്ന നടി, വെള്ളിയാഴ്ച തൃണമൂലിൽ ചേർന്നതോടെ തന്റെ മുൻ തീരുമാനം തെറ്റായിരുന്നുവെന്ന് പരസ്യമായി സമ്മതിച്ചു.

തനിക്ക് ഇന്ന് ക്രിസ്മസ് പോലെയാണെന്നും മുഖ്യമന്ത്രി മമത ബാനർജിയുടെയും അഭിഷേക് ബാനർജിയുടെയും നേതൃത്വത്തിൽ പുതിയ യാത്ര ആരംഭിക്കുന്നതിൽ സന്തോഷമുണ്ടെന്നും പർണോ മിത്ര പറഞ്ഞു. മുൻപ് ബി.ജെ.പിയിൽ ചേർന്നത് ഒരു തെറ്റായ തീരുമാനമായിരുന്നുവെന്നും മനുഷ്യർ തെറ്റ് ചെയ്യുന്നത് സ്വാഭാവികമാണെന്നും അത് തിരുത്താൻ കഴിഞ്ഞത് അനുഗ്രഹമായി കരുതുന്നുവെന്നും താരം കൂട്ടിച്ചേർത്തു. വരാനിരിക്കുന്ന തെരഞ്ഞെടുപ്പിൽ മത്സരിക്കുമോ എന്ന ചോദ്യത്തിന് അവർ വ്യക്തമായ മറുപടി നൽകിയില്ല. മമത ബാനർജിയുടെ ഭരണത്തിൽ സംസ്ഥാനം കൈവരിക്കുന്ന പുരോഗതിയിൽ ആകൃഷ്ടയായാണ് താരം തൃണമൂലിലേക്ക് എത്തിയതെന്ന് മന്ത്രി ചന്ദ്രിമ ഭട്ടാചാര്യ വ്യക്തമാക്കി.

അതേസമയം, പർണോ മിത്രയുടെ പാർട്ടി മാറ്റം ബി.ജെ.പിക്ക് യാതൊരു ദോഷവും ചെയ്യില്ലെന്ന് ബി.ജെ.പി നേതാവ് രുദ്രനിൽ ഘോഷ് പ്രതികരിച്ചു. 2007-ൽ ടെലിവിഷൻ സീരിയലുകളിലൂടെ അഭിനയരംഗത്തെത്തിയ പർണോ മിത്ര ബംഗാളി സിനിമയിലെ അറിയപ്പെടുന്ന മുഖമാണ്. ദേവ്, സോഹം ചക്രവർത്തി തുടങ്ങി നിരവധി സിനിമാ താരങ്ങൾ ഇതിനോടകം തൃണമൂലിൽ സജീവമാണ്. 2026-ലെ നിയമസഭാ തെരഞ്ഞെടുപ്പിന് മുൻപായി കൂടുതൽ സിനിമാ പ്രവർത്തകർ പാർട്ടിയിലേക്ക് എത്തുമെന്നാണ് തൃണമൂൽ നേതാക്കളുടെ പ്രതീക്ഷ.