പ്രധാനമന്ത്രിയുടെ വേദിക്കരികിൽ വൻ സുരക്ഷാവീഴ്ച; വ്യാജ പി.എം.ഒ ഉദ്യോഗസ്ഥനും അംഗരക്ഷകനും മുംബൈയിൽ പിടിയിൽ

പ്രധാനമന്ത്രി നരേന്ദ്ര മോദി പങ്കെടുക്കാനിരുന്ന പരിപാടി നടക്കുന്ന വേദിക്കരികിൽ നിന്ന് പി.എം.ഒ (PMO) ഉദ്യോഗസ്ഥനാണെന്ന് അവകാശപ്പെട്ട 24-കാരനെയും തോക്കുധാരിയായ അംഗരക്ഷകനെയും മുംബൈ പോലീസ് കസ്റ്റഡിയിലെടുത്തു. ബാന്ദ്ര-കുർള കോംപ്ലക്സിലെ (BKC) നിത മുകേഷ് അംബാനി കൾച്ചറൽ സെന്റർ പരിസരത്തുനിന്നാണ് അതീവ സുരക്ഷാ മേഖലയിൽ വെച്ച് ഇരുവരെയും സുരക്ഷാ സേന പിടികൂടിയത്. ആഗോള ഫിൻടെക് ഫെസ്റ്റിന്റെ ഏഴാം പതിപ്പ് ഉദ്ഘാടനം ചെയ്യുന്നതിനായി പ്രധാനമന്ത്രി എത്തുന്നതിന് തൊട്ടുമുമ്പായിരുന്നു സംഭവം.

പ്രധാനമന്ത്രിയുടെ സന്ദർശനത്തോടനുബന്ധിച്ച് കടുത്ത സുരക്ഷ ഏർപ്പെടുത്തിയിരുന്ന വേദിയിൽ ഇരുവരുടെയും പെരുമാറ്റത്തിൽ സംശയം തോന്നിയ സുരക്ഷാ ഉദ്യോഗസ്ഥർ തടഞ്ഞുനിർത്തി പരിശോധിക്കുകയായിരുന്നു. പരിശോധനയിൽ അംഗരക്ഷകനിൽ നിന്ന് തോക്ക് കണ്ടെത്തുകയും, പി.എം.ഒ ഉദ്യോഗസ്ഥനെന്ന് അവകാശപ്പെട്ട യുവാവിന് ഔദ്യോഗിക തിരിച്ചറിയൽ രേഖകൾ ഹാജരാക്കാൻ കഴിയാതെ വരികയും ചെയ്തു. വ്യാജ ഐ.ഡി കാർഡ് ഉപയോഗിച്ചാണ് ഇയാൾ സുരക്ഷാ വലയം ഭേദിക്കാൻ ശ്രമിച്ചതെന്നാണ് പ്രാഥമിക നിഗമനം.

തുടർന്ന് കസ്റ്റഡിയിലെടുത്ത ഇരുവരെയും മുംബൈ ക്രൈംബ്രാഞ്ചിന് കൈമാറി. പ്രധാനമന്ത്രി പങ്കെടുക്കുന്ന ഉച്ചകോടിയുടെ വേദിയിലേക്ക് ആയുധധാരിയായ വ്യക്തിയുമായി വ്യാജ ഉദ്യോഗസ്ഥൻ കടക്കാൻ ശ്രമിച്ച സംഭവത്തെ സുരക്ഷാ ഏജൻസികൾ അതീവ ഗൗരവത്തോടെയാണ് കാണുന്നത്. ഇവർ വേദിയിലെത്തിയതിന് പിന്നിലെ യഥാർത്ഥ ലക്ഷ്യത്തെക്കുറിച്ച് ക്രൈംബ്രാഞ്ച് ചോദ്യം ചെയ്തുവരികയാണ്.