നീറ്റ് ചോദ്യപേപ്പർ ചോർച്ച: മുഖ്യസൂത്രധാരനായ പ്രൊഫസർ പൂനെയിൽ പിടിയിൽ

രാജ്യത്തെ പിടിച്ചുലച്ച നീറ്റ് (NEET UG) ചോദ്യപേപ്പർ ചോർച്ചാക്കേസിൽ നിർണ്ണായക വഴിത്തിരിവ്. പരീക്ഷാ പേപ്പർ ചോർത്തിയതിലെ മുഖ്യ സൂത്രധാരനെന്ന് സംശയിക്കുന്ന കെമിസ്ട്രി പ്രൊഫസർ പി.വി കുൽക്കർണിയെ സിബിഐ അറസ്റ്റ് ചെയ്തു. നാഷണൽ ടെസ്റ്റിങ് ഏജൻസിക്ക് (NTA) വേണ്ടി ചോദ്യപേപ്പറുകൾ തയ്യാറാക്കുന്ന സമിതിയിൽ വർഷങ്ങളായി അംഗമായിരുന്നു ഇയാൾ. പൂനെയിലെ തന്റെ വീട്ടിൽ രഹസ്യമായി നടത്തിയ കോച്ചിങ് ക്ലാസ് വഴിയാണ് കുൽക്കർണി ചോദ്യങ്ങൾ ചോർത്തിയതെന്ന് സിബിഐ കണ്ടെത്തി.

മെയ് 3-ന് നടന്ന പരീക്ഷയുടെ ചോദ്യപേപ്പർ ഏപ്രിൽ അവസാനവാരം തന്നെ കുൽക്കർണിക്ക് ലഭിച്ചിരുന്നു. കേസിലെ മറ്റൊരു പ്രതിയായ മനീഷ വാഗ്മാരെയുടെ സഹായത്തോടെ നടത്തിയ പ്രത്യേക ക്ലാസിൽ വിദ്യാർത്ഥികൾക്ക് ചോദ്യങ്ങളും ഉത്തരങ്ങളും ഇയാൾ പറഞ്ഞുകൊടുത്തു. പരീക്ഷയിൽ ഇതേ ചോദ്യങ്ങൾ തന്നെ ആവർത്തിച്ചതായും ക്ലാസിൽ പങ്കെടുത്ത ഓരോ വിദ്യാർത്ഥിയിൽ നിന്നും ലക്ഷക്കണക്കിന് രൂപ പ്രതികൾ വാങ്ങിയതായും സിബിഐ പ്രസ്താവനയിൽ വ്യക്തമാക്കി. മനീഷ വാഗ്മാരെയും കേസിൽ അറസ്റ്റ് ചെയ്തിട്ടുണ്ട്.

രാജ്യവ്യാപകമായി നടക്കുന്ന അന്വേഷണത്തിന്റെ ഭാഗമായി ഇതുവരെ ഏഴ് പേരാണ് പിടിയിലായത്. രാജസ്ഥാനിലെ ജയ്പൂർ സ്വദേശികളായ മംഗി ലാൽ, ദിനേഷ് ബിവാൽ എന്നിവരെയും സിബിഐ കസ്റ്റഡിയിലെടുത്തു. രാജസ്ഥാനിലെ സികാർ കേന്ദ്രീകരിച്ച് പ്രവർത്തിക്കുന്ന ഈ സംഘത്തിന് മറ്റ് സംസ്ഥാനങ്ങളിലെ കോച്ചിങ് സെന്ററുകളുമായും ബന്ധമുണ്ട്. മുൻ വർഷങ്ങളിലും സമാനമായ രീതിയിൽ ചോദ്യപേപ്പറുകൾ ചോർത്തി ഇവർ വിൽപന നടത്തിയിട്ടുണ്ടോ എന്ന കാര്യത്തിലും വിശദമായ അന്വേഷണം നടക്കുകയാണ്.