നേപ്പാൾ മിന്നൽ പ്രളയം: മരണസംഖ്യ 734 ആയി; 275 ഇന്ത്യക്കാരെ കാണാനില്ലെന്ന് വിദേശകാര്യ മന്ത്രാലയം

നേപ്പാളിലുണ്ടായ മിന്നൽ പ്രളയത്തിൽ മരണസംഖ്യ 734 ആയി ഉയർന്നു. 1400-ലധികം പേരെ കാണാതായിട്ടുള്ളതിൽ 275 പേർ ഇന്ത്യക്കാരാണെന്ന് വിദേശകാര്യ മന്ത്രാലയം അറിയിച്ചു. കാണാതായ മലയാളികളിൽ ഏഴ് പേരെക്കുറിച്ചുള്ള വിവരങ്ങൾ ഇതുവരെ ലഭ്യമായിട്ടില്ലെന്ന് നോർക്ക വ്യക്തമാക്കി. അതേസമയം, ചൈന അതിർത്തിയിൽ കുടുങ്ങിയ 900 പേർ സുരക്ഷിതരാണെന്നും അതിൽ 598 ഇന്ത്യക്കാർ നേപ്പാളിലേക്ക് എത്തിയെന്നും വിദേശകാര്യ മന്ത്രാലയം അറിയിച്ചു.

ദുരന്തത്തിൽ തലനാരിഴയ്ക്ക് രക്ഷപ്പെട്ട കാസർകോട് കാഞ്ഞങ്ങാട് സ്വദേശിയായ റിട്ട. എസ്.ഐ പ്രദീപ് കുമാറും സുഹൃത്തുക്കളും ഉൾപ്പെടെ 31 മലയാളികൾ നെടുമ്പാശ്ശേരി വിമാനത്താവളം വഴി നാട്ടിൽ തിരിച്ചെത്തി. സുനാമിക്ക് സമാനമായാണ് പ്രളയജലം ഇരച്ചെത്തിയതെന്ന് ഇവർ സാക്ഷ്യപ്പെടുത്തി. രക്ഷപ്പെടുത്തിയ 108 ഇന്ത്യക്കാരെ ഉടൻ നാട്ടിലെത്തിക്കും.

ഇന്ത്യയിൽ നിന്നുള്ള 11 അംഗ എൻ.ഡി.ആർ.എഫ് സംഘം നേപ്പാളിലെത്തി രക്ഷാപ്രവർത്തനം ആരംഭിച്ചിട്ടുണ്ട്. പ്രളയം തകർത്ത ജലവൈദ്യുത തുരങ്കങ്ങളിൽ ഇന്ത്യൻ വിദഗ്ധ സംഘം പരിശോധന നടത്തി. പ്രളയജലം അതിർത്തി കടന്നെത്താനുള്ള സാധ്യത മുൻനിർത്തി ഉത്തരാഖണ്ഡ്, ബിഹാർ, ഉത്തർപ്രദേശ് എന്നീ സംസ്ഥാനങ്ങളിൽ കടുത്ത ജാഗ്രതാ നിർദേശം നൽകിയിട്ടുണ്ട്.