കാവേരിയിലെ അണക്കെട്ട് പദ്ധതിയിൽ വിട്ടുവീഴ്ചയില്ലെന്ന് ഡി.കെ. ശിവകുമാർ; ശക്തമായ എതിർപ്പുമായി തമിഴ്‌നാട് കോൺഗ്രസ്
കാവേരി നദിക്ക് കുറുകെയുള്ള മേകദാതു അണക്കെട്ട് നിർമ്മാണത്തെച്ചൊല്ലി കർണാടകയിലെയും തമിഴ്‌നാട്ടിലെയും കോൺഗ്രസ് നേതാക്കൾ തമ്മിലുള്ള ഭിന്നത രൂക്ഷമാകുന്നു. വെള്ളിയാഴ്ച പ്രധാനമന്ത്രി നരേന്ദ്ര മോദി പങ്കെടുത്ത വേദിയിൽ, മേകദാതു പദ്ധതിക്ക് വേണ്ട നിയമപരമായ അനുമതികൾ കേന്ദ്രസർക്കാർ വേഗത്തിൽ നൽകണമെന്ന് കർണാടക മുഖ്യമന്ത്രി ഡി.കെ. ശിവകുമാർ ആവശ്യപ്പെട്ടിരുന്നു. പദ്ധതി നടപ്പിലാക്കുന്നത് തടയാൻ ആരെയും അനുവദിക്കില്ലെന്നും അദ്ദേഹം വ്യക്തമാക്കിയിരുന്നു.
ഡി.കെ. ശിവകുമാറിന്റെ ഈ നിലപാടിനെതിരെ തമിഴ്‌നാട് കോൺഗ്രസ് അധ്യക്ഷൻ മാണിക്യം ടാഗോർ രൂക്ഷവിമർശനവുമായി രംഗത്തെത്തി. സുപ്രീംകോടതി വിധിയെയും കാവേരി ജലതർക്ക ട്രിബ്യൂണലിന്റെ ഉത്തരവുകളെയും ലംഘിക്കുന്ന സമീപനമാണ് കർണാടകയുടേതെന്ന് അദ്ദേഹം ആരോപിച്ചു. ഇത്തരം നീക്കങ്ങൾ തമിഴ്‌നാട്ടിലെ കർഷകരുടെ ഉപജീവനമാർഗത്തെ സാരമായി ബാധിക്കുമെന്നും, തമിഴ്‌നാടിന്റെ സമ്മതമില്ലാതെ അണക്കെട്ട് നിർമ്മിക്കാൻ കേന്ദ്രം അനുമതി നൽകരുതെന്നും അദ്ദേഹം ആവശ്യപ്പെട്ടു. സംസ്ഥാനത്തിന്റെ അവകാശങ്ങൾ സംരക്ഷിക്കാൻ ഏതറ്റം വരെയും പോരാടുമെന്നും മാണിക്യം ടാഗോർ കൂട്ടിച്ചേർത്തു.
എന്നാൽ, വിഷയത്തിലെ യഥാർത്ഥ വസ്തുതകൾ മാണിക്യം ടാഗോറിന് അറിയില്ലെന്ന് മറുപടി നൽകിയ ഡി.കെ. ശിവകുമാർ പദ്ധതിയുമായി മുന്നോട്ടുപോകുമെന്ന് ആവർത്തിച്ചു. ബെംഗളൂരു നഗരത്തിലെ കുടിവെള്ളക്ഷാമം പരിഹരിക്കുന്നതിനും 400 മെഗാവാട്ട് വൈദ്യുതി ഉത്പാദിപ്പിക്കുന്നതിനുമായി കർണാടകയിലെ രാമനഗര ജില്ലയിലാണ് മേകദാതു അണക്കെട്ട് വിഭാവനം ചെയ്തിരിക്കുന്നത്. അണക്കെട്ട് നിർമ്മിച്ചാലും തമിഴ്‌നാടിന് ലഭിക്കേണ്ട കാവേരി ജലത്തിന്റെ വിഹിതത്തിൽ കുറവുണ്ടാകില്ലെന്നാണ് കർണാടകയുടെ നിലപാട്. എങ്കിലും, സംസ്ഥാനത്തെ കർഷകരുടെ താൽപ്പര്യങ്ങളും ജലവിഹിതവും സംരക്ഷിക്കുന്നതിനായി പദ്ധതിയുടെ പ്രാരംഭഘട്ടം മുതൽ തന്നെ തമിഴ്‌നാട് ഇതിനെ എതിർത്തുവരികയാണ്. മുൻ മുഖ്യമന്ത്രി എം.കെ. സ്റ്റാലിൻ ഉൾപ്പെടെയുള്ള തമിഴ്‌നാട്ടിലെ പ്രമുഖ രാഷ്ട്രീയ നേതാക്കളും പദ്ധതിക്കെതിരെ നേരത്തെ രംഗത്തുവന്നിരുന്നു.