ജനകീയ ഇംപീച്ച്മെന്റ് തുടങ്ങി; ഗ്യാനേഷ് കുമാറിനെ പുറത്താക്കണമെന്ന് 'ഇന്ത്യ' മുന്നണിയുടെ പ്രമേയം

മുഖ്യ തിരഞ്ഞെടുപ്പ് കമ്മിഷണർ (CEC) ഗ്യാനേഷ് കുമാറിനെതിരേ പ്രതിപക്ഷ സഖ്യമായ 'ഇന്ത്യ' (INDIA) മുന്നണി പ്രതീകാത്മകമായി ജനകീയ ഇംപീച്ച്മെന്റ് പ്രമേയം അവതരിപ്പിച്ചു. രാജ്യത്ത് പൗരന്മാരുടെ വോട്ടവകാശം ഗുരുതരമായ ഭീഷണിയിലാണെന്നും ഭരണഘടനാ സ്ഥാപനങ്ങളുടെ അന്തസ്സും സുതാര്യതയും സംരക്ഷിക്കാനാണ് ഈ അടിയന്തര നടപടിയെന്നും പ്രമേയം അവതരിപ്പിച്ചുകൊണ്ട് കോൺഗ്രസ് അധ്യക്ഷൻ മല്ലികാർജുൻ ഖാർഗെ വ്യക്തമാക്കി.

മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാർ കേന്ദ്ര സർക്കാരിന്റെയും ബി.ജെ.പി നേതൃത്വത്തിന്റെയും നേരിട്ടുള്ള നിർദ്ദേശാനുസരണമാണ് പ്രവർത്തിക്കുന്നതെന്ന് പ്രതിപക്ഷം ആരോപിച്ചു. വോട്ടർപ്പട്ടിക പരിഷ്കരണത്തിന്റെ (SIR) മറവിൽ കോടിക്കണക്കിന് വോട്ടർമാരെ നീക്കം ചെയ്തതുൾപ്പെടെയുള്ള വിവേചനപരമായ നടപടികളാണ് കമ്മിഷൻ സ്വീകരിക്കുന്നതെന്നും ഖാർഗെ ചൂണ്ടിക്കാട്ടി.

ഡൽഹി രാജാജി മാർഗിലുള്ള മല്ലികാർജുൻ ഖാർഗെയുടെ വസതിയിലാണ് പ്രതീകാത്മക ജനകീയ പാർലമെന്റും ഇംപീച്ച്മെന്റ് നടപടികളും സംഘടിപ്പിച്ചത്. മുൻ ലോക്‌സഭാ സ്പീക്കർ മീരാ കുമാറിന്റെ അധ്യക്ഷതയിൽ ചേർന്ന ചടങ്ങിൽ സോണിയാ ഗാന്ധി, രാഹുൽ ഗാന്ധി, കെ.സി. വേണുഗോപാൽ, കപിൽ സിബൽ തുടങ്ങിയ പ്രമുഖ നേതാക്കളും സിവിൽ സൊസൈറ്റി പ്രതിനിധികളും പങ്കെടുത്തു. വിഷയത്തിൽ നവംബർ 1-ന് രാംലീല മൈതാനത്തേക്ക് ബഹുജന മാർച്ച് നടത്താനും പ്രതിപക്ഷ സഖ്യം തീരുമാനിച്ചിട്ടുണ്ട്.