രാഹുലിനെയും പ്രിയങ്കയെയും വിട്ടയച്ചു, കസ്റ്റഡിയിൽ മൂന്ന് മണിക്കൂർ

പ്രധാനമന്ത്രിയുടെ വസതിക്ക് മുന്നിൽ സമരം ചെയ്ത് കസ്റ്റഡിയിലായ പ്രതിപക്ഷ നേതാവ് രാഹുൽ ഗാന്ധി, പ്രിയങ്ക ഗാന്ധി എം.പി, എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ എന്നിവരടക്കമുള്ള നേതാക്കളെ മൂന്ന് മണിക്കൂറിന് ശേഷം പോലീസ് വിട്ടയച്ചു. കസ്റ്റഡിയിലെടുത്ത രാഹുൽ ഗാന്ധിയെ ഛത്രസാൽ സ്റ്റേഡിയത്തിലേക്കാണ് പോലീസ് ബലമായി മാറ്റിയത്. ഇവിടേക്കും വലിയ രീതിയിൽ കോൺഗ്രസ് പ്രവർത്തകർ പ്രതിഷേധവുമായി എത്തിയതോടെയാണ് വിട്ടയക്കാൻ പോലീസ് നിർബന്ധിതരായത്. സമരം ഇനിയും തുടരുമെന്നും വിഷയം പാർലമെന്റിൽ ഉന്നയിക്കുമെന്നും രാഹുൽ ഗാന്ധി വ്യക്തമാക്കി.

കസ്റ്റഡിയിൽ നിന്ന് പുറത്തിറങ്ങിയ ശേഷം വൈകാരികമായാണ് പ്രിയങ്ക ഗാന്ധി പ്രതികരിച്ചത്. "എന്റെ സഹോദരനെ ഭയപ്പെടുത്താനാകില്ല, വിദ്യാർത്ഥികളുടെ ആവശ്യങ്ങൾ നിറവേറ്റുന്നതുവരെ പോരാട്ടം തുടരും," എന്ന് പ്രിയങ്ക മാധ്യമങ്ങളോട് പറഞ്ഞു. ഇതിനിടെ, മന്ദിർ മാർഗ് പോലീസ് സ്റ്റേഷനിൽ കസ്റ്റഡിയിൽ കഴിഞ്ഞിരുന്ന പ്രിയങ്കയെ കാണാൻ സോണിയ ഗാന്ധി നേരിട്ടെത്തുകയും കൂടിക്കാഴ്ച നടത്തുകയും ചെയ്തു.

നേരത്തെ, പ്രധാനമന്ത്രിയുടെ വസതിക്ക് മുന്നിൽ നടന്ന ഉപരോധ സമരത്തിനിടെ രാഹുൽ ഗാന്ധിയേയും ജനപ്രതിനിധികളെയും വസ്ത്ര കീറുന്ന രീതിയിൽ വലിച്ചിഴച്ചാണ് പോലീസ് വാഹനത്തിലേക്ക് മാറ്റിയത്. എം.പിമാരായ ഡീൻ കുര്യാക്കോസ്, പി.സി. വിഷ്ണുനാഥ് എന്നിവർക്ക് നേരെ പോലീസ് മൃഗീയമായി ബലപ്രയോഗം നടത്തിയതായി കോൺഗ്രസ് ആരോപിച്ചു. അതിനിടെ കേന്ദ്രമന്ത്രി ജിതേന്ദ്ര സിംഗ് സ്ഥലത്തെത്തി രാഹുലുമായി ചർച്ച നടത്തിയെങ്കിലും, പ്രധാനമന്ത്രി നരേന്ദ്ര മോദിയും കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാനും രാജി വെയ്ക്കാതെ സമരത്തിൽ നിന്ന് പിന്നോട്ടില്ലെന്ന് രാഹുൽ നിലപാടെടുത്തു. ചോദ്യപ്പേപ്പർ ചോർച്ചയിലും വിദ്യാർത്ഥികൾക്ക് നേരെയുണ്ടായ പോലീസ് ലാത്തിച്ചാർജ്ജിലും പ്രതിഷേധിച്ചാണ് പ്രതിപക്ഷ നേതാക്കളുടെ നേതൃത്വത്തിൽ പ്രധാനമന്ത്രിയുടെ വസതിയിലേക്ക് മാർച്ച് നടത്തിയത്. വിട്ടയക്കപ്പെട്ടെങ്കിലും പ്രധാനമന്ത്രിയുടെ രാജിയാവശ്യപ്പെട്ട് സമരം കൂടുതൽ ശക്തമാക്കാനാണ് കോൺഗ്രസ് തീരുമാനം.