ആർ.ബി.ഐയുടെ കറൻസി ചെസ്റ്റിൽ നിന്ന് 8.7 കോടി രൂപ കവർന്നു; ബാങ്ക് ജീവനക്കാരൻ പിടിയിൽ

റിസർവ് ബാങ്ക് ഓഫ് ഇന്ത്യയുടെ (RBI) കറൻസി ചെസ്റ്റിൽ നിന്ന് 8.7 കോടി രൂപ മോഷ്ടിച്ച കേസിൽ പൊതുമേഖലാ ബാങ്ക് ജീവനക്കാരൻ അറസ്റ്റിലായി. ബാങ്ക് ഓഫ് ബറോഡയിലെ പണം സൂക്ഷിപ്പ് ചുമതലക്കാരനായ ഹർസിദ്ധ കഡിയാർ എന്ന ജീവനക്കാരനാണ് പോലീസിന്റെ പിടിയിലായത്. പുതിയ നോട്ടുകൾ സംഭരിക്കുന്നതിനും വിതരണം ചെയ്യുന്നതിനുമായി ആർ.ബി.ഐ ഒരുക്കിയിട്ടുള്ള അതീവ സുരക്ഷിതമായ സംഭരണശാലയിലാണ് ഇയാൾ തട്ടിപ്പ് നടത്തിയത്.

കഴിഞ്ഞ ജനുവരി 13-നായിരുന്നു കേസിനാസ്പദമായ സംഭവം. പ്രതിയായ കഡിയാറും മറ്റ് രണ്ട് കരാർ തൊഴിലാളികളും ചേർന്ന് വലിയ ഇരുമ്പ് പെട്ടികളിലാക്കിയാണ് ബാങ്കിൽ നിന്ന് പണം കടത്തിയത്. മോഷണത്തിന് ശേഷം ആർക്കും സംശയം തോന്നാതിരിക്കാൻ ഇയാൾ ഏപ്രിൽ 20 വരെ പതിവുപോലെ ബാങ്കിൽ ജോലിക്ക് ഹാജരായിരുന്നു.

ഓഡിറ്റിങ്ങിൽ കുടുങ്ങി; ലക്ഷങ്ങൾ ക്രിപ്റ്റോയിലേക്ക് മാറ്റി

ഏപ്രിൽ അവസാനത്തോടെ ഇയാൾ ദീർഘകാല അവധിയിൽ പ്രവേശിച്ചതിനെ തുടർന്ന് പുതിയ ചുമതലക്കാരൻ ബാങ്കിലെത്തി ഓഡിറ്റ് നടത്തിയപ്പോഴാണ് പണം നഷ്ടപ്പെട്ട വിവരം പുറത്തറിയുന്നത്. തുടർന്ന് അധികൃതർ സി.സി.ടി.വി ദൃശ്യങ്ങൾ പരിശോധിച്ചതോടെ ജനുവരി 13-ന് കഡിയാർ ബാങ്കിലെത്തി പെട്ടികളുമായി മടങ്ങുന്ന ദൃശ്യങ്ങൾ കണ്ടെത്തുകയായിരുന്നു. ഇയാളുടെ കാറിൽ നടത്തിയ പരിശോധനയിൽ 2.2 കോടി രൂപ പോലീസ് കണ്ടെടുത്തു.

മോഷ്ടിച്ച തുക ഉപയോഗിച്ച് ഇയാൾ വിവിധയിടങ്ങളിൽ സ്വത്തുക്കൾ വാങ്ങിയതായും വലിയൊരു പങ്ക് ക്രിപ്റ്റോ കറൻസിയിലേക്ക് മാറ്റിയതായും പോലീസ് അന്വേഷണത്തിൽ തെളിഞ്ഞു. മോഷണവിവരം പുറത്താകാതിരിക്കാൻ ആർ.ബി.ഐയുടെ ഔദ്യോഗിക പോർട്ടലിൽ കൃത്രിമമായി നിർമ്മിച്ച വ്യാജ ബാലൻസ് സർട്ടിഫിക്കറ്റുകൾ ഇയാൾ നിരന്തരം അപ്‌ലോഡ് ചെയ്തിരുന്നതായും പോലീസ് കണ്ടെത്തിയിട്ടുണ്ട്.