‘വനിതാസംവരണം വേണം, പക്ഷേ മണ്ഡല പുനർനിർണയം വേണ്ട’; സർവകക്ഷി യോഗത്തിൽ നിലപാട് വ്യക്തമാക്കി ഡി.എം.കെ.

ലോക്‌സഭയിൽ 33 ശതമാനം വനിതാ സംവരണം നടപ്പിലാക്കുന്നതിനെ പൂർണ്ണമായി പിന്തുണയ്ക്കുമ്പോഴും, അതുമായി ബന്ധപ്പെട്ട മണ്ഡല പുനർനിർണ്ണയ (Delimitation) നടപടികളിൽ കേന്ദ്ര സർക്കാരിനെതിരെ ശക്തമായ നിലപാടുമായി ദ്രാവിഡ മുന്നേറ്റ കഴകം (DMK). പാർലമെന്റിന്റെ വർഷകാല സമ്മേളനത്തിന് മുന്നോടിയായി കേന്ദ്ര സർക്കാർ വിളിച്ചുചേർത്ത സർവകക്ഷി യോഗത്തിലാണ് ഡി.എം.കെ തങ്ങളുടെ ആശങ്കകളും ആവശ്യങ്ങളും വ്യക്തമാക്കിയത്.

പുതിയ സെൻസസ് നടപടികൾക്കോ മണ്ഡല പുനർനിർണ്ണയത്തിനോ വേണ്ടി കാത്തുനിൽക്കാതെ, ലോക്‌സഭയുടെ നിലവിലെ അംഗസംഖ്യയുടെ അടിസ്ഥാനത്തിൽ തന്നെ വനിതാ സംവരണം ഉടനടി നടപ്പിലാക്കണമെന്ന് ഡി.എം.കെ നേതാവും എം.പിയുമായ തിരുച്ചി ശിവ യോഗത്തിൽ ആവശ്യപ്പെട്ടു. ജനസംഖ്യാ അടിസ്ഥാനത്തിലുള്ള മണ്ഡല പുനർനിർണ്ണയം ദക്ഷിണേന്ത്യൻ സംസ്ഥാനങ്ങൾക്ക് വലിയ രാഷ്ട്രീയ തിരിച്ചടിയാകുമെന്ന ആശങ്ക അദ്ദേഹം പങ്കുവെച്ചു. ജനസംഖ്യാ നിയന്ത്രണത്തിൽ മികച്ച നേട്ടം കൈവരിച്ച തമിഴ്‌നാട് ഉൾപ്പെടെയുള്ള ദക്ഷിണേന്ത്യൻ സംസ്ഥാനങ്ങളുടെ പാർലമെന്റ് സീറ്റുകളും രാഷ്ട്രീയ പ്രാധാന്യവും കുറയ്ക്കുന്ന രീതിയിലാകരുത് മണ്ഡല പുനർനിർണ്ണയമെന്നും, അല്ലാത്തപക്ഷം ഈ നടപടികൾ അടുത്ത 25 വർഷത്തേക്ക് മാറ്റിവയ്ക്കണമെന്നും തിരുച്ചി ശിവ കേന്ദ്രത്തോട് ആവശ്യപ്പെട്ടു.

നേരത്തെ മണ്ഡല പുനർനിർണ്ണയ നീക്കങ്ങളെ ശക്തമായി എതിർത്തിരുന്ന ഡി.എം.കെ, നിലവിലെ രാഷ്ട്രീയ സാഹചര്യത്തിൽ ഈ ഭരണഘടനാ ഭേദഗതി ബില്ലിനെ ചില നിബന്ധനകളോടെ പിന്തുണച്ചേക്കുമെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. ഭരണപക്ഷമായ എൻ.ഡി.എയ്ക്ക് (NDA) ലോക്‌സഭയിൽ മൂന്നിൽ രണ്ട് ഭൂരിപക്ഷം തികയ്ക്കാൻ ഡി.എം.കെയുടെ 22 എം.പിമാരുടെ പിന്തുണ നിർണ്ണായകമാണ്. ഭരണഘടനാ ഭേദഗതി പാസ്സാക്കാൻ ആവശ്യമായ 360 വോട്ടുകൾ തികയ്ക്കാൻ, നിലവിൽ 319 എം.പിമാരുള്ള എൻ.ഡി.എ സഖ്യത്തിന് ഡി.എം.കെയുടെ ഈ നിലപാട് മാറ്റം വലിയ ആശ്വാസമായി മാറും.