സ്ത്രീവിരുദ്ധ പരാമർശമെന്ന് ആരോപണം; രമേഷ് പിഷാരടിക്കെതിരെ മഹിളാ മോർച്ച പോലീസിൽ പരാതി നൽകി

പാലക്കാട്ടെ യുഡിഎഫ് (UDF) സ്ഥാനാർത്ഥി രമേഷ് പിഷാരടിക്കെതിരെ സ്ത്രീവിരുദ്ധ പരാമർശം ആരോപിച്ചു മഹിളാ മോർച്ച പരാതി നൽകി. പിഷാരടിക്കെതിരെ നടപടിയെടുക്കണമെന്ന് ആവശ്യപ്പെട്ട് മഹിളാ മോർച്ച ജില്ലാ പ്രസിഡന്റ് കവിതാ മേനോനാണ് ജില്ലാ പോലീസ് മേധാവിക്ക് പരാതി നൽകിയത്. രമേഷ് പിഷാരടി സ്ത്രീത്വത്തെ അപമാനിക്കുന്ന തരത്തിൽ സംസാരിച്ചുവെന്നാണ് പരാതിയിലെ പ്രധാന ആരോപണം.

കഴിഞ്ഞ ബുധനാഴ്ച രാത്രി വടക്കന്തറയിൽ തിരഞ്ഞെടുപ്പ് പ്രചാരണത്തിനെത്തിയ പിഷാരടിയെ ബിജെപി വനിതാ കൗൺസിലറുടെ നേതൃത്വത്തിൽ തടഞ്ഞത് വലിയ വിവാദമായിരുന്നു. വോട്ട് ചോദിക്കുന്നത് തടഞ്ഞതല്ലെന്നും മറിച്ച് സ്ത്രീവിരുദ്ധ പരാമർശം നടത്തിയതിനോടുള്ള പ്രതിഷേധമായിരുന്നു അതെന്നും എൻഡിഎ സ്ഥാനാർത്ഥി ശോഭാ സുരേന്ദ്രൻ വ്യക്തമാക്കി. വിഷയത്തിൽ പിഷാരടി മാപ്പുപറയണമെന്നും ശോഭ ആവശ്യപ്പെട്ടു. എന്നാൽ ബിജെപി പ്രവർത്തകർ തടഞ്ഞ സംഭവത്തിൽ നിയമനടപടിക്കില്ലെന്നും ബാക്കി കാര്യങ്ങൾ ജനങ്ങൾ വിലയിരുത്തട്ടെ എന്നുമായിരുന്നു പിഷാരടിയുടെ പ്രതികരണം.

സംവിധായകൻ രഞ്ജിത്ത് ലൈംഗികപീഡനക്കേസിൽ അറസ്റ്റിലായതുമായി ബന്ധപ്പെട്ട് മാധ്യമപ്രവർത്തകർ ചോദിച്ച ചോദ്യത്തിന് പിഷാരടി നൽകിയ മറുപടിയാണ് വിവാദങ്ങൾക്ക് ആധാരം. ഇത്തരം കാര്യങ്ങൾ വ്യക്തിപരമായ കാര്യങ്ങളല്ലേ എന്നും അതിൽ അഭിപ്രായം പറയേണ്ടതുണ്ടോ എന്നുമുള്ള പിഷാരടിയുടെ പരാമർശമാണ് സ്ത്രീവിരുദ്ധമാണെന്ന് ആരോപിച്ച് രാഷ്ട്രീയ ആയുധമാക്കുന്നത്. തിരഞ്ഞെടുപ്പ് അടുത്തിരിക്കെ പാലക്കാട് മണ്ഡലത്തിൽ ഈ വിഷയം വലിയ ചർച്ചകൾക്ക് വഴിവെച്ചിരിക്കുകയാണ്.