ഫിഫ റാങ്കിങ്ങിൽ ഒന്നാം സ്ഥാനം തിരിച്ചുപിടിച്ച് അർജന്റീന; രണ്ടാം സ്ഥാനത്ത് സ്പെയിൻ

ലോകകപ്പ് ഫൈനലിലേക്ക് മുന്നേറിയതിന് പിന്നാലെ ഫിഫ റാങ്കിങ്ങിൽ ഒന്നാം സ്ഥാനം തിരിച്ചുപിടിച്ച് അർജന്റീന. യൂറോപ്യൻ കരുത്തരായ സ്പെയിനെ മറികടന്നാണ് ലയണൽ മെസ്സിയും സംഘവും വീണ്ടും ലോക ഒന്നാം നമ്പറിലെത്തിയത്. നിലവിൽ 1970.37 പോയിന്റുമായാണ് അർജന്റീന ഒന്നാം സ്ഥാനത്ത് നിൽക്കുന്നത്. രണ്ടാമതുള്ള സ്പെയിനിന് 1965.61 പോയിന്റാണുള്ളത്.

2026 ലോകകപ്പ് ആരംഭിക്കുമ്പോൾ നിലവിലെ ചാമ്പ്യന്മാരായ അർജന്റീന തന്നെയായിരുന്നു ഒന്നാം സ്ഥാനത്ത്. എന്നാൽ ലോകകപ്പിലെ മികച്ച പ്രകടനത്തോടെ ഫ്രാൻസ് ഒന്നാം സ്ഥാനത്തേക്കും പിന്നാലെ സ്പെയിൻ രണ്ടാം സ്ഥാനത്തേക്കും ഉയർന്നതോടെ അർജന്റീന മൂന്നാം സ്ഥാനത്തേക്ക് പിന്തള്ളപ്പെട്ടിരുന്നു. നോക്കൗട്ട് റൗണ്ടുകളിൽ അർജന്റീനയുടെ മത്സരങ്ങൾ എക്സ്ട്രാ ടൈമിലേക്ക് നീണ്ടുപോയതാണ് പോയിന്റ് നഷ്ടപ്പെടാൻ ഇടയാക്കിയത്. ആദ്യ സെമി ഫൈനലിൽ ഫ്രാൻസിനെ പരാജയപ്പെടുത്തിയതോടെ സ്പെയിൻ താൽക്കാലികമായി ഒന്നാം സ്ഥാനത്തേക്ക് എത്തിയിരുന്നു. എന്നാൽ രണ്ടാം സെമിയിൽ നിശ്ചിത സമയത്തിനുള്ളിൽ ഇംഗ്ലണ്ടിനെ പരാജയപ്പെടുത്തിയതോടെ അർജന്റീന റാങ്കിങ്ങിൽ ഒന്നാം സ്ഥാനം തിരിച്ചുപിടിക്കുകയായിരുന്നു.

ഞായറാഴ്ച നടക്കുന്ന കലാശപ്പോരാട്ടത്തിൽ അർജന്റീന വിജയിക്കുകയാണെങ്കിൽ ഒന്നാം സ്ഥാനത്ത് തന്നെ തുടരും. എന്നാൽ സ്പെയിനാണ് കിരീടം നേടുന്നതെങ്കിൽ അവർ ഒന്നാം സ്ഥാനം തിരിച്ചുപിടിക്കും.