തകർപ്പൻ സെഞ്ചുറിയുമായി അസ്ഹറുദ്ദീൻ; കാലിക്കറ്റിന്റെ കൂറ്റൻ സ്കോർ മറികടന്ന് ആലപ്പി റിപ്പിൾസ്

കേരള ക്രിക്കറ്റ് ലീഗിൽ (KCL) മുഹമ്മദ് അസ്ഹറുദ്ദീന്റെ അവിസ്മരണീയ സെഞ്ചുറിയുടെ മികവിൽ കാലിക്കറ്റ് ഗ്ലോബ്സ്റ്റാഴ്‌സ് ഉയർത്തിയ കൂറ്റൻ ലക്ഷ്യം മറികടന്ന് ആലപ്പി റിപ്പിൾസ്. കാലിക്കറ്റ് ഉയർത്തിയ 214 റൺസ് വിജയലക്ഷ്യം മൂന്ന് പന്തുകൾ ബാക്കിനിൽക്കെ നാല് വിക്കറ്റ് നഷ്ടത്തിൽ ആലപ്പി മറികടന്നു. ജയത്തോടെ ആലപ്പി റിപ്പിൾസ് പോയിന്റ് പട്ടികയിൽ ഒന്നാം സ്ഥാനത്തേക്ക് ഉയർന്നു.

ആദ്യം ബാറ്റ് ചെയ്ത കാലിക്കറ്റ്, അഖിൽ സ്‌കറിയയുടെയും (38 പന്തിൽ 72) വരുൺ നായനാരുടെയും (36 പന്തിൽ 62) അർധസെഞ്ചുറികളുടെ കരുത്തിൽ 20 ഓവറിൽ 213/5 എന്ന കൂറ്റൻ സ്കോറാണ് പടുത്തുയർത്തിയത്. ക്യാപ്റ്റൻ രോഹൻ കുന്നുമ്മൽ 42 റൺസെടുത്തു. എന്നാൽ മറുപടി ബാറ്റിംഗിൽ 60 പന്തുകളിൽ നിന്ന് 10 സിക്‌സറുകളും 5 ഫോറുമടക്കം 112 റൺസുമായി പുറത്താകാതെ നിന്ന അസ്ഹറുദ്ദീന്റെ പ്രകടനം ആലപ്പിയെ വിജയതീരത്തെത്തിക്കുകയായിരുന്നു. അക്ഷയ് ടി.കെ (43), കെ.എ. അരുൺ (31) എന്നിവരും അസ്ഹറിന് മികച്ച പിന്തുണ നൽകി.

മത്സരത്തിലെ സെഞ്ചുറിയോടെ കെസിഎല്ലിൽ നിരവധി റെക്കോർഡുകളും അസ്ഹറുദ്ദീനെ തേടിയെത്തി. ഒരു കെസിഎൽ സീസണിൽ രണ്ട് സെഞ്ചുറികൾ നേടുന്ന രണ്ടാമത്തെ താരമായും, ടൂർണമെന്റിന്റെ ചരിത്രത്തിൽ 1000 റൺസ് തികയ്ക്കുന്ന ആദ്യ താരമായും അസ്ഹറുദ്ദീൻ മാറി.